Тыгайже, очыни, кажне еҥ дене лиеда: пылыш шоныдымын-вучыдымын петырна. Ситыдымашын амалже шуко, тудо самолетын шичмыже але лифтын волымыж годымат палдырнен кертеш. Тыгай годым шӱвылым икмыняр гана нелаш кӱлеш, да пылыш почылтеш.
- Пылыш йӱштылмӧ годым петырнен гын, вӱдым ватке паҥга полшымо дене лукташ темлалтеш.
- Южо еҥ пылышым ватке паҥга дене мыняр чӱчкыдын эрыктет, тудо тунар яндар лиеш манын шона. Уке! Пылышыште утыждене чӱчкыдын пургедмылан кӧра кишан пробкылан погынаш амал лиеш, молан манаш гын тудо огеш эрыкталт, а тапталтеш гына. Кишан пробко чыла ийготышто погынен кертеш, да тудым квалифицироватлыме специалист веле луктын сеҥа.
- Пылыш кылмен черланымылан кӧра петырнен гын, тыште вес йӧн-влак дене пайдаланыман. Нер петырныме годым шуэн огыл пылышат колмым чарна, молан манаш гын нине орган-влак икте-весышт дене кылдалтыныт. Тидыже поснак айдемын нерым нӱшталмыж годым палдырна.
Пылышын кылмен черланымылан кӧра петырнымыж годым теве мом ышташ кӱлеш:
— нерым кок парня дене темдалман да южым пылышыште пудештме гай йӱк шоктымеш лукташ тыршыман;
— тылеч вара шӱвылым 5-7 гана нелман.
Пылыш петырныме деч шарым вичкыж олымпырче гоч пуэн овартымат сайын полша.
Маргарита ИВАНОВА ямдылен
Авторын фотожо/ «Марий Эл» увер агентстве
