Йӱштӧ складыште пашам ыштымемлан кӧра чӱчкыдын кылмен черланем. Поснак нерге орландара. Тиде ситыдымаш деч иктаж калык йӧным темлен кертыда мо?
Ю.ЛОГИНОВА
Шернур район
Нергем эмлыме 15 йӧным темлена.
- Нер петырныме деч йошкарушмен сок полшен кертеш. Тудым кажне неррожыш кечеш 3 гана 3-4 чӱчалтыш дене чӱчалтараш кӱлеш.
Тыгак пакчасаска сок дене витыктарыме ватке тампоным неррожыш кечеш 2-3 гана 10 минутлан чыкаш пайдале.
- Кажне неррожыш каланхой сокым кечеш 3 гана 3 чӱчалтыш дене чӱчалтараш але тудын дене тазыла чорам йыгаш темлалтеш.
Тыгак кушкыл сок дене нӧртымӧ ватке тампоным чыкен шындаш лиеш.
- Нергем кояшудо (алой) сокат сайын эмла. Тудын дене йошкарушмен да каланхой сок семынак пайдаланыман. А эше тушко изишак мӱйым але тынарак (1:1) кешыр сокым ешараш лиеш. Тиде вартышым кечеш икмыняр гана кажне неррожыш 3 чӱчалтыш дене чӱчалтарыман.
- Нерге пижме годым йолгопаш горчичникым пыштыман, тудым фланель дене пӱтыралман, вара меж носким чийыман. 1-2 шагат гыч горчичникым кораҥдыман, носким угыч чийыман да шокшо пӧлемыште икмыняр шагат коштман. Процедурым кастене ыштыме годым горчичникым эр мартеат кодаш лиеш.
- Кастене йоллан 1 кугу совла кукшо горчице, кочмо содо але шинчал да 5-8 л вӱд дене шокшо ванным ышташ, а йӱдлан меж носким чиен возаш лиеш. Но тиде процедур шӱм-вӱргорно, верге чер, вӱргорно варикоз, гипертоний дене орланыше-влаклан келшен огеш тол.
- Калык эмлызе-влак тыгак йолгопашке йӱдлан йод дене сеткым «сӱретлаш», вара меж носким чияш да малаш возаш темлат.
- Кажне неррожыш 3 чӱчалтыш дене ментол ӱйым чӱчалтараш пайдале. Тиде средствымак саҥгашке, вуйвичкыжыш да нерыш йыгаш сай.
- Неррожым лушкыдо шинчал раствор дене мушкаш лиеш.
- Нерге да грипп тургыжландарыме годым кочкыш рацион гыч шӧр негызан продуктым кораҥдыман. Кылмен черланыме годым кукшо продуктым кочкаш темлалтеш.
Нер петырныме годым неррожыш кечеш икмыняр гана вӱршудо ӱйым чӱчалтарыман. Тидланже 20-30 г тыгыдемдыме кушкыл пеледышыш 200 г нӧшмӱйым темыман, вартышым, жапын-жапын рӱзалтен, шокшо верыште 3 арня шинчыктыман, вара шӱрыман да кӱлмӧ семын пайдаланаш тӱҥалман. Ӱйым пычкемыш да юалге верыште кучыман.
- Нерген чот тургыжландарымыж годым каструльышто шолтымо вӱдыш 1 кугу совла кочмо содым ешарыман да сайын лугыман. Шокшо одеял дене вуйге леведалтман да, содым изи совла дене жапын-жапын ешарен, пар ӱмбалне шӱлыман.
- Икмыняр пачаш осылымо меж шовычым ырыктыман да шӱргыш пыштыман. Тудо, кок шӱргымат, саҥган ӱлыл ужашыжым да оҥылашын кӱшыл ужашыжым авалтен, нерым тичмашнек петырышаш. Юалге юж пурен ынже керт, шокшо ынже лек манын, шовычым шӱргӧ пелен темденрак кучыман. Умшам почман да шке шӱлышым шовычысо шокшо пытымеш шӱлыман.
Темлыме процедурым кечеш икмыняр гана да поснак йӱдлан ыштыман, но капкыл температур кӱзымӧ годым огыл. Тылеч вара йӱштыш лекман огыл, вуйым шокшышто кучыман. Тиде процедур поснак йоча-влаклан пайдале.
- Нергем эмлыме тергыме да моткочак пайдале йӧн – кӱжгӧ одеял дене вуйге леведалтын, шӱмге шолтымо пареҥге парым шӱлаш.
- Пӱнчӧ лышташнер отварын паржат моткоч пайдале. Тудо нергем веле огыл, тыгак кокыртышым, бронхитым да кылмен черланымым эмла.
Тидланже 50 г пӱнчӧ лышташнерым пыштыман да 1 л вӱдым темыман йоҥгытым шолшо вӱдан каструльыш вераҥдыман да 10 минут шолтыман, вара, шокшын пӱтыралын, 3 шагат шинчыктыман, шӱрыман. Ямде средствым кечеш 5 гана мӱй але эҥыж варене йӧре йӱман.
- Икнаре налме мӱй ден вӱршудо ӱйым пырля йӧрыман. Тиде вартышым неррожыш кечывал деч вара да малаш вочмо деч ончыч йыгыман.
- Нерге тургыжландарыме годым чайым эҥыж варене дене йӱаш пайдале.
Тыгак висвис настой дене ингаляцийым ышташ кӱлеш: 20 г коштымо кушкыл пеледышыш 1 стакан шолшо вӱдым темыман, шокшын пӱтыралын, иктаж 4 шагат шинчыктыман, вара шӱрыман. Ырыктыме настой дене йытын солыкым (салфеткым) нӧртыман, нер кумдыкыш пыштыман да шӱртӧ кӱпшан солык дене шокшемдыман.
М.ИВАНОВА ямдылен
М.Иванован фотожо/ «Марий Эл» увер агентстве
ТЕМЛЫМЕ ЙӦН ДЕНЕ ПАЙДАЛАНЫМЕ ДЕЧ ОНЧЫЧ ВРАЧ ДЕНЕ КАҤАШЫЗА!
