Марий Элын Тазалыкым аралыме министерствыжын 14 декабрь эрдене увертарымыж почеш, пытартыш суткаште республикнан больницылаж гыч паремше 26 пациентым мӧҥгӧ колтымо, тыгодымак 54 черлым эмлалташ пыштыме. Тыге, теҥгече эрдене регионнан 10 инфекционный стационарыштыже 1148 пациент у коронавирус инфекций да пневмоний деч эмлалтын. Ты чот гыч 179 черле неле состоянийыште лийын, 35 пациент шодым искусственно вентилироватлыме йӧн дене шӱлен, 495 еҥлан кислород кӱлын.
«Коронавирус: статистика» сайтын 14 декабрьысе уверже почеш, пытартыш суткаште Российыште у коронавирус инфекций дене 27328 граждан черланен, Марий Элыште – 54 еҥ. Пандемий пагытыште республикыштына COVID-19 дене чылаже 8298 граждан инфицироватлалтын, 7327 пациент паремын, 107 черле колен.
М.ИВАНОВА
