ЛӰМГЕЧЕ НОВОСТИ СПОРТ ТАЗАЛЫК Чолгалык

«Физкультур дене таҥлалташ чыла йӧн уло…»

«Физкультур дене таҥлалташ чыла йӧн уло…»
Кодшо арнян Марий Элыште Олимпийский советын президентше, ончычсо спорт министр Владимир Михайлович Чумаков 75 ияш лӱмгечыжым палемден.
Мотор, кумда, уэмдыме «Дружба» стадионыш шыргыжалын, ошкыл тольо. Ты жапыште тренироватлалтше куштылго атлет, футболист-шамыч дене саламлалте. Изиш ончычсо футбол нерген каласкалыш да эреак ойлымо мутшым эше ик гана пеҥгыдемдыш: «Кажне айдеме лӱмлӧ спортсмен лийын огеш керт, а физкультур дене таҥлалташ чыла йӧн уло, ӧрканаш гына огеш кӱл. Таза лийза. Ӱмырем стадионыштак эртен, манаш келшен толеш. Каныш кечыже… Кроссым куржталмаш, бассейныште иймаш, куштымаш, ече дене куржталмаш, икманаш, спортын чыла видше дене кылым кучаш, чыла велым шуаралташ кӱлеш».
– Поро жап, Владимир Михайлович! Шочмо кечыдам стадион гычак тӱҥалаш шоненна, вет кажне паша кечыдажат стадион гычак тӱҥалын, – мане кирам нӧлтымӧ дене СССР-ын спорт мастерже, курыкышто куржталмаш дене турлӧ таҥасымашын организаторжо Александр Замков. – 75 ийлан 75 минут куржтална. Палем, туныктымо стажда Козьмодемьянскыште тӱҥалын. Сай условийым ыштымыланда тау. Медальым лӱмын ямдыленна. Молыланат кужу ӱмырым, тазалыкым.
– Куржталме корнышто Тендам ужаш – моткоч кугу куан. Куштылго атлетике Федераций лӱм дене шокшын саламлена. Опыт ден шинчымаш шке результатшым пуат. Тазалыкым, кужу ӱмырым тыланена. Чыла шонымашда шукталтше, – мане Марий Элыште куштылго атлетике федерацийын вуйлатышыже, тренер Алексей Гребнев. – Шуко ий пырля пашам ыштенна. регионыштына спортым вияҥден колтымо шотышто кугу пашам ыштенда. Тау Тыланда.
– Шовашыж дене комдышыжо иктак улыт, маныт. Пагалыме айдемым, Владимир Михайловичым, саламлаш пелашем Александр Николаевич дене пырля Курыкмарий район гыч лӱмынак толынна, – йолым эмгатымыжлан кӧра стадион йыр скандинав тоя дене коштшыжла ешарыш Вера Арсентьевна Замкова.

Меат саламлымашке ушнена да Владимир Михайлович Чумаковлан пеҥгыде тазалыкым, ласка илышым, творческий шӱлышым тыланена.
Е.Эшкинина.

Опубликовать в Одноклассники

Добавить комментарий