УВЕР ЙОГЫН

Марий Эл гыч — Беларусьыш

Тиде кечылаште Марий Элын коло еҥан делегацийже Беларусь Республикыш каен. Тудым Марий Эл вуйлатыше Александр Евстифеев вуйлата.

11-12 октябрьыште Могилевышто Беларусь ден Российысе регион-влакын визымше форумышт эрта. Тушто кок кугыжанышын президентше-влак Александр Лукашенко ден Владимир Путин участвоватлат. Юбилейный мероприятийым тиде кок элын кӱшыл палатыже-влак эртарат. Тудо кугыжаныш-влак коклаште ваш келшен илымашке, экономике кылым пеҥгыдемдымашке виктаралтын. Кок кече жапыште формушто тӱрлӧ направлений дене вич секций пашам ышта: аграрный политике, законодательствым шотыш кондымаш, цифран экономике, молодежный политике, тӱнямбал кӱкшытысӧ паша да экономический лӱдыкшыдымылык.

 Марий Эл Республик вуйлатыше Александр Евстифеевын паша программыштыже — Марий Эл ден Беларусь правительстве-влак коклаште  торгово-экономический, торгово-технический, культурный да гуманитарный  келшымаш шотышто ойпидышым ыштымаш. Тыгак икмыняр официальный вашлиймаш палемдалтын.

 Форумын тӱвыра программыжым Марий Эл гыч кайыше республикысе  калык творчество да тӱвыра-каныш научно-методический рӱдерын «Эрвел мари» мурышо да куштышо калык ансамбльже, марий эстраде мурым йоҥгалтарыше артист, тӱрызӧ-влак сылнештараш тӱҥалыт.

 Беларусь Евразийысе экономике ушемыш пурышо кугыжаныш-влак коклаште Марий Элын ик эн тӱҥ партнержылан шотлалтеш. Кодшо ийыште внешнеторговый операций кугыт 39,9 миллион долларыш шуын, тышкак Марий Эл гыч Беларусьыш ужалаш наҥгайыме 32 миллион доллараш сатум пуртыман, а тушечын 7,9 миллион долларашым кондымо. Тений пелийысе  внешнеторговый операций кугыт 47,3 миллион долларыш шуын.

Тӱҥ шотышто ме топливно-энергетический комплексын сатужым, холодильникым, морозильникым, нӧшмым, электрон интегральный схемым, кечыше да омса кӧргыш вераҥдыме кӧгӧным экспортироватлена. Импортироватлыме сату коклаште тӱҥ верым кочкыш продуктым ышташ кучылталтше оборудований, нелытым шупшыкташ, нӧлташ, ястараш, ик вер гыч весыш кусаркалаш кучылталтше машина ден устройство-влак, косметике  да молат улыт.

 Марий Эл Республик вуйлатышын Организаций да аналитике виктемжын уверже негызеш С.Носова ямдылен.

Опубликовать в Одноклассники

Добавить комментарий