Марий Элыште тений сентябрь мучаш марте 300 миллион утла теҥгеаш кугу инфраструктур проектым илышыш пуртымо паша мучашлалтеш.
Тиде – Медведево посёлкышто Сеҥымашлан 75 ий темме лӱмеш бульвар. Инфраструктур бюджет кредит кӱшеш чоҥымо кумдык таче кечылан 99,8 процентлан ышталтын.
Марий Элым вуйлатыше Юрий Зайцев тушто лийын да у мер кумдыклан кӱкшӧ акым пуэн. «Сеҥымашлан 75 ий темме лӱмеш бульвар Медведево посёлкышто илыше калыкын ик эн йӧратыме верышкыже савырнен. Каныш кечылаште тышке Медведево район, Йошкар-Ола да моло ола гыч турист-шамыч гыч еш дене канаш толыт. Чоҥышо-влаклан пашам сайын да жапыштыже ыштымыштлан тау. У да вияҥше микрорайоным сылнештарыше эше ик мер кумдык уло – тиде куандара», – палемден тудо.
Бульварыште йолешке-влаклан верым ыштыме паша шукталтын. Тушто светильник, ужалыме киоск, велосипед дене кудалаш корно, спорт кумдык, йоча-влаклан модаш площадке-шамычым келыштарыме, тыгак кукшо светодиодан кок фонтаным вераҥдыме. Бульвар мучко кок могырымат асфальтобетонан корно, автомашинам шогалташ вер улыт.
Бульварым тений 30 сентябрь марте почаш палемдыме.
Марий Эл Республикым вуйлатышын администрацийжын информаций паша пӧлкажын уверже негызеш Г.Кожевникова ямдылен
