УВЕР ЙОГЫН

Пӱсӧ йодыш: Районыш лекташ амал лийын

Параньга район адинистрацийыште Марий Эл Республик вуйлатыше пелен религий шӱлышан организаций-влак дене пашам ыштыше советын кумдаҥдыме заседанийже эртен. Тушко Марий Эл Правительстве Председательын икымше алмаштышыже М. Васютин, тӱвыра, печать да калык-влакын пашашт шотышто министр К.Иванов, образований да науко министр Н.Адамова, самырык-влакын политикышт, спорт да туризм министрын алмашыштыже С.Егошин да молат миеныт. Тыгак Параньга районысо ял шотан илем-влакын вуйлатышышт, имам-шамыч ӱжалтыныт. 

Ончыч республикыште традиционный исламым вияҥден толшо организаций-влакын пашашт дене республикын тӱҥ муфтийже, мусульман-влакын региональный духовный управленийыштым вуйлатыше Фанус Салимгареев палдарен. Тений январьыште Йошкар-Оласе тӱҥ мечеть пелен «Изге» мусульман духовный профессионал образовательный организаций – медресе — ышталтын, тудо кугыжаныш регистрацийымат эртен. Январьыште тушто Морко да Звенигово, апрель тӱҥалтыште Параньга да Марий Турек районласе, Советский ден Медведево посёлкыласе имам-влакын квалификацийыштым нӧлтымӧ курслам эртареныт.  Заседанийыш погынышо-влакын темлымышт почеш, лишыл жапыште Мусульман-влакын региональный духовный управленийышт мусульман священнослужитель-влакын кадр резервшым ыштышаш. Тушко традиционный ислам дене келгырак шинчымашым налаш шонышо еҥ-влакым ушат. Вара нуным вузлаш туныкташ колтат. Тыгак традиционный исламым пропагандироватлыме да религиозный экстремизм иделогийым дискредитироватлыме шотышто духовно- просветительский пашам вияҥден колташ палемдыме.

Заседаний годым республикыште самырык-влак коклаште этнический  да религиозный экстремизм сӱрет лийын кертмым кораҥден толмо шотыштат йодышым тарватеныт. Молан манаш гын Йошкар-Оласе вузлаште тачысе кечылан мусульман элла гыч тунемаш толшо-влак шагалынжак огытыл. Нунын коклаште ваш умылымаш лийже манын, келшен толшо организаций, министерстве ден ведомство пырля пашам ыштышаш улыт. Ты шотышто кодшо ийын нунын пырля эртарыме меропримятийышт сай лектышым пуэныт, палемден Станислав Егошин.

Тӱҥ каҥашыме йодыш Параньга посёлкысо мечеть общинын  Мусульман-влакын региональный духовный управленийыштын шулдыр йымакыже  пурымо йыр каен. Ты общине посёлкым да Лаж ялым авалта, да кызыт шкевуя пашам ышта. Тушто тӱрлӧ национальностян да тӱрлӧ конфессийым кучышо калык ила. Жапын-жапын тудын пашаже шотышто да еҥ-влак коклаштат умылыдымаш, шуко йодыш лектыт. Верысе мусульман-влак дечат вуйшиймаш пура.  Тидыже традиционнный исламым кучышо-влакым поснак тургыжландара. Санденак совет Параньга районысо администрацийлан ты йодышым рашемдыме шотышто Мусульман-влакын региональный духовный управленийыштлан полшаш темлен. Поснак радикализм идейым калыкыште шаркалыме ваштареш шогалман. Тыштыже районысо «Наша жизнь» газетат кугу полышым пуэн кертеш. Сандене совет редакций пашаеҥ-влаклан  ты темылан посна колонкым ойыраш темлен.

С.Носова.
Марий Элысе тӱвыра министерствын пресс-службыжын фотосӱретше.

Опубликовать в Одноклассники

Добавить комментарий