Марий Элыште икымше гана Пашазе профессий-влакын фестивальышт эртен. 20-21 сентябрьыште республикысе колледж ден техникум-влак кыдалаш профессионал образований дене палыме лияш кумылан-шамычлан омсаштым почыныт.
Мероприятий-влак кок направлений почеш эртеныт: икымшыже – школышто тунемше ден ача-ава-шамычлан, кокымшыжо – кугурак ийготан ден паша верым пуышо-влаклан.
Палемдыме кечылаште колледж ден техникумлаш толшылан профессий могырым тергымашан мастер-класс-шамыч лийыныт, мастерскойлаште экскурсийым эртареныт, профессийла да специализированный оборудованийла дене палдареныт.
Ушештарена, 2012 ий гыч республикыштына регионын бюджетше кӱшеш ик эн йодмашан профессийлан тунемме проект илышыш пурталтеш. Тудо Марий Эл Образованй да науко министерствын организацийжылан шотлалтше чыла 19 колледж ден техникумыштыжо шыҥдаралтеш.
Тенийысе тунемме идалык гыч 8-11-ше класслаште тунемше-влаклан чумыр налмаште 29 профессийлан яра тунемаш йӧн уло. Ты гана чылаже 775 еҥым туныкташ палемдыме. Ӱдыр-рвезе-влак кандаш тылзаш кӱчык программе почеш регионлан ик эн йодмашан специальностьым (услуго сфер ден беспилотник-шамычым виктараш тунемме гыч машиностроений, транспорт, энергетике дене кылдалтше марте) налаш йӧным ыштыме. А кугурак ийготан-шамычлан чумыр налмаште 18 профессий дене курслаш погат. Нуно тений октябрьыште тӱҥалыт, сандене йодмашым сентябрьыштак пуэн шуктыман.
Тидын деч посна «Образований» национальный проектын «Кажне йочан сеҥымашыже» национальный проектше почеш Марий Элыште йоча-влаклан кружок ден секцийлаште моштымашым вияҥдаш чылаже 6336 верым почмо. 5-18 ияш марте ийготан-влаклан секций ден кружок-шамыч куд направлений дене улыт: художественный, социально-гуманитарный, естественно-научный, технический, туризм-краеведений, физкультур-спорт.
Г.Кожевникова
Фотом Марий Эл Образований да науко министерствын сайтше гыч налме
