УВЕР ЙОГЫН

Марий Элыште илен лекташ лийме кугытым пеҥгыдемденыт

Кодшо кечылаште Марий Эл правительствыште 2018 ий I кварталыште илен лекташ лийме кугыт шотышто пунчалым луктыныт. 

Документ дене келшышын, Марий Элыште ик еҥлан шотлымаште тылзыште илен лекташ 8806 теҥге кӱлын. Пашам ыштыше граждан-влакын кугурак суммо – 9365 теҥге. Йоча-шамычлан илен лекташ лийме кугыт – 9166 теҥге, пенсионер-шамычлан – 7201 теҥге.

Кодшо ийын IV кварталже дене таҥастарымаште тенийсе I кварталын илен лекташ лийме кугытшо 64 теҥгелан кӱзен. Ӱмаште тиде показатель 8742 теҥге лийын.

Ушештарена, илен лекташ лийме кугыт республикысе калыкын илыш качествыжым аклаш, граждан-шамычлан социальный полышым пуаш, социальный программе-влакым ямдылаш да илышыш пурташ, бюджетым формироватлаш кӱлеш.

М.ИВАНОВА.

Опубликовать в Одноклассники

Добавить комментарий