ФИНН-УГОР ТӰНЯ

Марий Элыште — венгр кино

«Кугезына-влакын кышашт дене» этнокультур проект-влак фестиваль жапыште республикыштына ятыр мероприятий эртен. Нунын кокла гыч иктыже – венгр кино фестиваль.

1 ноябрьыште «Супер 8» кинотеатрыште тудым торжественно почмаште тӱвыра, печать да калык-влакын пашашт шотышто министр Константин Иванов, Йошкар-Олаште Российын йот элла дене пашам ыштыше министерствыжын представительже Лариса Полушина, Казаньыште Венгрийын консулжо Ласло Дароци лийыныт.

— Венгр кином ончыкташ Марий Эл Республикын рӱдолажым тыглай огыл ойырен налынна. Венгрийын генеральный консулжо кеҥежым Йошкар-Олаш толын коштын ыле. Лач тунам республикым вуйлатыше дене тыгай мероприятийым эртарыме нерген мутланен келшеныт. Ме кажне ийын тыгай фестивальыш калыкым чумырена да венгр киноискусство дене палдарена. Тыгодым исторический веле огыл, кажне кечын ончаш келыштаралтше фильм-влакым темлена. А нунышт элнан историйже, сар деч варасе илыш нерген каласкалат, — палемден Ласло Дароци. — Тыгай пашанам умбакыжат шуена да вес ганат вашлийына манын ӱшанен кодам. 

— Тиде фестивальым у проектын икымше ошкылжылан шотлаш лиеш. Вет 2020 ийыште республикыштына Финн-угор кинофестивальым эртараш тӱҥалына, — палдарен Константин Анатольевич. — А ты гана родо-тукым калыкын киножым ончаш толшо-влакын кузе аклымыштым эскераш шоненна. Кином ончаш кугурак веле огыл, самырык-шамычат шукын погыненыт. А тидын гоч ме фестивальын кӱлешлыкше нерген ойлен кертына.

Фестиваль жапыште республикыштына илыше-влак режиссёр Габор Херендин «Кинчем – моё сокровище» киножым онченыт. Венгр фильмыште Кинчем лӱман имне да тудын тӱрлӧ таҥасымаште сеҥымашыже, кок еҥын йӧратымашыже нерген ойлалтеш.

А 2 ноябрьыште Звенигово оласе кинотеатрыште режиссёр Марта Месарошын «Аврора бореалис: северное сияние» да режиссёр Ференц Тёрёкын «1945» киножо-влакым ончыктеныт.

Палемдыман, нине фильм-шамычым авторышт 2017 ийыште войзеныт да нуно   тӱнямбалсе тӱрлӧ кинофестивальлаште наградым налыныт.

А.Байкова.

М.Скобелевын фотожо. 

   

 

 

Опубликовать в Одноклассники

Добавить комментарий