Эстон калык фольклор
Похьяконн – тыге лӱмденыт эстон фольклорышто ӱшкыж капан, кишке почан, ужава йолан янлыкым. Тудо ты элыш йӱдвел гыч толын улмаш. Корныштыжо чыла илышым пытарен. Умбакыжат тыгак лиеш ыле, пиалеш, еҥ-влак тудын дечын аралалташ тунемыныт.
Похьяконн иканаште кум меҥге торашке тӧршталтен кертын. Тидыжым тудо кум идалыклан ик гана веле ыштен гынат, йырже мом ужын – чыла кочкын. Янлыкын коваштыже кӱртньӧ дечат пеҥгыде. А шинчаже йӱдым тул гай йӱла. Иктаж-кӧ тудым ужын гын, ушым йомдарышыла, шке тушманын умшашкыже каен.
О.МОШКИНА
