ЯЛОЗАНЛЫК

Лектыш сай, игече гына куандарыже

Республикыштына уржа-сорла тургым умбакыже шуйна. Июль мучаште да август тӱҥалтыше лийше йӱр мыняр-гынат чаракым ыштен, но пытартыш кечыште игече тӧрланыме гай лийын, сандене ялозанлык кушкылым ончен куштышо тӱшка озанлык-влак пасу пашам жапыштыже ворандарен колташ тыршат.

Эртыше кугарнян лач тыгай шонымашым  «Шойбулакский» племзавод ЗАО-н Кугунур отделенийжын агрономжо Владислав Изергинат (снимкыште) каласыш. Мийымына годым Оршанке районысо Кугунур ял воктенысе пасушто паша шке радамже дене каен: индеш комбайн да куд «КамАЗ» дене тыршыше ялозанлык пашаеҥ-влак 150 гектар кумдыкышто кокияш шыдаҥым погеныт да Оршанке комбикорма заводыш шупшыктеныт. «Лектыш могай?» йодышлан Владислав Григорьевич тыге вашештыш:

– Лектыш сай, но эртыше йӱрлан кӧра шурно лап возын – ужыда, комбайн-влак, нелын каят? Уржа-сорла тургымым 1 августышто тӱҥалынна, а таче 21 август, а ме чылаже Оршанке кундемыште 8327 гектар кумдыкышто 2900 гектарыштыже гына, тиде 35 процент лиеш, ялозанлык культурым поген налынна. Тиде пеш шагал.  Кокла шот дене налмаште, кум кушкыллан гектар еда 42,2 центнер лиеш: кокияш шыдаҥ – гектар еда 46 центнер, кокияш шож – гектар еда 41, пурса – 28 центнер.

Г.КОЖЕВНИКОВА

Авторын фотожо

Опубликовать в Одноклассники

Добавить комментарий