28 майыште Курык марий район Пайскырык селаште XVII Игнатьев лудмаш эртышаш.
Тӱҥ тарватыме теме — «Курыкмарий-влак поликультурный пространствыште». Тений лудмаш филологий науко доктор, Марий кугыжаныш университетын почетный профессоржо Л.П.Васикован (1927- 2012) шочмыжлан 90 ий теммылан пӧлеклалтеш.
Лингвист, литературовед, фольклорист, историк, археолог, этнограф, этномузыковед, искусствовед, культуролог, научный пашаеҥ, кӱшыл тунемме заведенийын туныктышыжо, тоштер да архив пашаеҥ, аспирант, магистрант, студент-влак ӱжалтыт. Докладым лингвистике, литератур, фольклор, историй, краеведений, образований, тӱвыра, искусство тематике дене ямдылаш лиеш. Конференций 10 шагатлан Пайскырык тӱвыра пӧртышто почылтеш. Йошкар-Ола гыч каяш кумылан-влак 6 шагатат 30 минутлан тӱвыра, печать да калык-влакын пашашт шотышто министерстве деке толшаш улыт. Автобус лиеш. Конференцийыште участвоватлаш шонышо-влак йодмаш дене МарНИИЯЛИ-н литератур пӧлкашке, Надежда Алексеевна Федосеева деке тыгай телефон декне лектын кертыт: 8(8362)45-25-92; е-mail: fedna74@yandex.ru.
