УВЕР ЙОГЫН

«Мый таза лийнем!»

Йошкар-Оласе йоча эмлымверын онкогематологий отделенийжылан 30 ий темын. Тидын шумлык тушто «Мый таза лийнем!» пайрем эртен.

Отделенийым ятыр ий Российын да Марий Эл Республикын сулло врачше Зинаида Семёновна Гордеева вуйлата. Пайремыште тудо икымше пациент, шучко черым сеҥаш полшышо врач ден медсестра, ӱдырыштын але эргыштын илышышт верч геройла кучедалше ача-ава, полышым йодмылан вашештыше волонтёр ден поро еҥ-влак нерген ойлен.

А палынак кушшо пациент-шамыч пӱрымашыштышт поро кышам кодышо чыла еҥлан уло шӱм-чон дене тауштеныт, а нунын ача-авашт, кажне докторын, медсестран, санитаркын лӱмыштым палемден, эртыше неле кече, ий-влакым шинчавӱд йӧре шарналтеныт да нунылан пеледышым, радынам кучыктеныт, тыгак отделенийын кызытсе пациентше-шамычлан ӱстембал модышым конденыт.

– Паремме, тӧрланыме годым те чытышдам, нелылык дене келшымыдам, йӧратымашдам ончыктенда, – черле-влакын чон тазалыкышт шотышто тургыжланыше Павел ача манын, – тыланда кугу пиалым тыланем, да тек Юмо мемнан эше ик гана ваш ышта.

Медицине психолог О.Колчина отделенийысе пациент-влакын яра жапышт, тӱрлӧ сӱретым, аппликацийым, модышым ыштымышт, эмлалтме годым мом шонымышт нереген презентацийым ямдылен.

Вара эмлымверын пациентше, пашаеҥже, тыгак пайремыш толшо уна-влак концертым онченыт. Нуным «Планета» куштышо эстраде ансамбль, Торго-технологический колледжыште тунемше мурызо Ленара Нигматуллина, «Компот» фирме гыч весела клоун-влак, «Песочница» арт-студий гыч сӱретче Ксения Тихонова ден Наталья Якупова куандареныт.  

Пайремыште медицине маскан шуко йоча лийын. Нуно кызыт онкогематологий отделенийыште эмлалтыт, нелылыкым сеҥен, таза илышыш ошкылыт, а пеленышт эреак профессиональный медицине пашаеҥ-влак улыт.

М.ИВАНОВА.

Опубликовать в Одноклассники

Добавить комментарий