Анна Сидушкинан лӱмжӧ марий искусствышто кумдан чапланен. Лач тудо марий ӱдырамаш-влак кокла гыч профессиональный музык шинчымашым икымше налын да МАССР искусствын сулло пашаеҥже лӱм дене икымше палемдалтын.
Анна Романовнан шочмыжлан 105 ий темме лӱмеш Йошкар-Олаште тудын илыме пӧрт пырдыжешыже шарныктыш оҥам почыныт.
Педагог, музыковед-фольклорист, композитор Анна Сидушкина кӱслем профессионально шокташ туныктымо школлан негызым пыштен.
– Изи ялыште шочын кушшо ӱдырын марий сымыктышым вияҥдымаште надырже кугу. Тудын тыршымыжлан кӧра Маргосфилармонийын артистше-влак фронтовой концерт бригаде дене Кугу Отечественный сарыште салтак-влаклан концертым ончыктен, сеҥымашым лишемдаш полшеныт. А хормейстер да художественный вуйлатышылан ыштымыж годым кӱслезе-влакым «Пеледыш» ансамбльыш чумырен. Ты коллектив ятыр гана Москошто Союз-влак пӧртын колоннан залыштыже мастарлыкым ончыктен. Ансамбльын участникше-влак коклаште мыйын авамат лийын, — Марий Эл правительстве председательын икымше алмаштышыже Михаил Васютин шарналтыш мемориал оҥам почмаште. — Анна Романовналан кӧра Курыкмарий кундемыште Куприянов лӱмеш йоча музыкальный школат почылтын. Тушто тудо йоча-влакым кӱслем шокташ туныктен да кызытат икшыве-влак ты семӱзгарым куанен шокташ тунемыт.
– Анна Сидушкинан тыршымыж дене 1960-шо ийлаште кӱсле йӱк Москошто йоҥгалтын. А ынде теве 23 октябрьыште марий семӱзгарын йӱкшӧ уэш Москосо Кремль полатыште йоҥгаш тӱҥалеш. Тушто Анна Романовнан шочмо кундемже гыч «Шӹжарвлӓ» ден Палантай лӱмеш тӱвыра да сымыктыш колледж пеленысе «Чинчывий» ансамбль-влак шоктат, — палемден республикын тӱвыра, савыктыш да калык паша шотышто министрже Константин Иванов.
Шарныктыш оҥам почмаште А.Сидушкина дене пырля пашам ыштыше, тудым палыше да усталык корныжым шымлыше, пашажым умбакыже шуйышо-влак коклаште тукым шӱжарже-влак Фаина Эшмякова ден Тамара Большаковат лийыныт.
— Анна Романовнан шке семӱзгаржым мыланем пуаш ӱшанен кодымыж дене мый кӱслезе лийынам. Тидлан 60 ий утла эртен гынат, ты семӱзгарым тачат мый кугешнен аралем, — чонжым почо «Шӹжарвлӓ» образцовый ансамбльым вуйлатыше Фаина Эшмякова.
Кӱсле — республикнан брендше, сандене ме Анна Романовнан ыштен кодымо пашажым аклышаш да ончыкыжымат вияҥдышаш улына. Тудын пашажым умбакыже шуйышо уло гын, Анна Сидушкиннан лӱмжӧ курымеш илаш тӱҥалеш.
А.БАЙКОВА
Авторын фотожо
