12 ноябрьыште Республикысе изосымыктыш тоштерыште «На просторах Вятской земли» выставке почылтын.
Тушто Йошкар-Оласе художественный училищын педагогшо ден студентше-влакын пленэрыште ямдылыме пашаштым чумырымо.
Ты тунемме учрежденийын препродавательже-влак Анна Санникова ден Иван Стан Киров областьысе Знаменка посёлкыш (Яран район) ятыр гана пленэр дене лектын коштыныт. Тынар ий жапыште ойыртемалтше вер нунылан да эше Российын тӱрлӧ кундемже гыч сӱретче-влаклан шерге да лишыл лийын шуктен, сандене ты гана педагог-влак училищын «Живопись» пӧлкаштыже тунемше икмыняр студентым: Анастасия Шаргинам, Дарья Молчановам, Татьяна Мавеевам, Алина Ибураевам, Ева Епловам да Максим Москвиным – пырля намиеныт.
– Чынжымак, ты верыште моткоч ласка, шып, сӱретат пеш куштылгын шочеш. Садлан тиде сымыктыш тӱням студент-влаклан ончыкташ да Российын тӱрлӧ кундемже гыч погынышо сӱретче-влак дене палымым ышташ шонымо. Ӱдыр-рвезе-влак дене, ик еш семын келшен, икте-весым умылен, тыршен пашам ыштенна, – палемдыш Сӱретче-влак ушемын Марий Элысе пӧлкажын председательже, педагог, пленэрын кураторжо Анна Санникова да студентше-влакым икымше выставкышт дене порын саламлыш.
– Анна Андреевнан тыршымыжлан кӧра выставкым чумырымо пашам тӱҥалтыш гыч мучаш марте пален нална: куштылгыжак огыл улмаш. Пленэрыш миен толмо кужу жаплан шарнаш кодеш. Тушто илыше-влакат мемнам порын вашлийыныт, йодышланна кумылын вашештеныт, кертмышт семын полшеныт. Мемнан мийымылан нунат куаненыт, эсогыл мешак дене олмам нумалын кондеденыт! – чон гыч лекше шомакшым каласыш художественный училищын кокымшо курсышто тунемше, пленэрын участникше Анастасия Шаргина.
– Лу кече жапыште чылан пырля келшен пашам ышташ, икте-весе деч мастарлыклан тунемаш да искусство аланыште кушкаш йӧн лийын. Пленэрыш миен коштмо дене пӱртӱсым ончен сӱретлаш эшеат чот йӧратен шынденам, вет йырваш улшо моторлыкым возен кодаш кӱлын. Чыла тидым тыланда ончыкташ манын, моткоч шуко пашам ямдылаш тыршыме. Мутат уке, шонымашке шуаш куштылгыжак огыл, моткоч кӱчык жапыште пӱртӱс, игече вашталтеш… – шыргыжалын ешарыш Дарья Молчанова. – Но кокымшо курсышто тунемме годым ӱян чия дене писын-писын ыштыме паша выставкыште ончыкталтеш манын, ӱшаненат омыл ыле. Мыланна, студент-влаклан искусство аланыште кушкаш полшымыланда да тӱткышым ойырымыланда моткоч кугу тау.
– Палыдыме верыш каен пашам ышташ йӧным пуымыштлан да илышыште тӱрлӧ нелылык деч лектын мошташ туныктымыштлан моткоч кугу тау. Пленэр – профессионал искусствыш ыштыме икымше кугу ошкыл, садлан тудо кужу жаплан шарнаш кодеш, – палемдыш самырык сӱретче Татьяна Матвеева.
Ӱдыр-рвезе-влакын пашаштым ончен лекмеке, ик жаплан чарайолын куржталме йоча пагытыш, ялыш пӧртылат. Сӱретла гоч кече лекме дене ялын помыжалтмыже да кече шичмешке тудын илышыже тӱрыснек почылтеш.
Икманаш, пӱртӱсыш лектын, тудын моторлыкшым ужын да шижын гына сӱретче-влак чапле да чоным куандарыше радына-влакым возат. Пленэрыш ушнымо сӱретче-влаклан мастарлыкым погаш да тудым пеҥгыдемдаш, шинчаончалтышым кумдаҥдаш да сӱретсымыктыш тӱням вес шинча дене ончалаш туныкта. Тидым выставке эше ик гана пеҥгыдемдыш.
Алевтина Байкова
Авторын фотожо
Снимкыште: самырык сӱретче-влак педагогышт А.Санникова дене пырля
