1 августышто Э.Сапаев лӱмеш Марий кугыжаныш опер да балет академический театр икымше гана Ражден Гумба лӱмеш Абхаз кугыжаныш филармонийыште (Сухуми ола) выступатлен.
Марий Эл гыч мийыше артист-влак С.С.Прокопьевын «Ромео и Джульетта» балетшым ончыктеныт. Постановкым РФ-ын сулло да Марий Элын калык артистше, театрын художественный вуйлатышыже Константин Иванов шынден. Каласыман, художник Борис Голодницкий дене пырля йӧршын у, вес сынан балетым ямдыленыт, Абхазийысе зритель-влаклан тудым ончаш темленыт.
Марий театр вес кундемыш «Россий ден Абхазий коклаште тӱвыра кылым вашла вияҥдымаш» программе кышкарыште миен коштын. «Программын кумдыкшо да тудын авалтыме проект-влак вашла келшыше кок эл коклаште, кок элжынат тӱвыраже поян да шкешотан, кылым пеҥгыдемдымаште могай кугу ошкыл ышталтмым ончыктат», – каласен Абхазий Республик культурын министржын пашажым шуктышо Динара Смыр мероприятийым почмо годым.
Марий Эл правительстве председательын алмаштышыже, республикын тӱвыра, печать да калык-влакын пашашт шотышто министрже, либреттым возышо К.Иванов палемден:
– Унам вашлийын моштышо республикын рӱдолаштыже лияш мыланна моткоч куанле. Гастрольлан ме чылалан палыме «Ромео и Джульетта спектакльым ойырен налынна, репертуарыштына ты балет эн йӧратымылан шотлалтеш, мыланем поснак лийшыл. Молан манаш гын 2005 ийыште ГИТИС-ын балетмейстер факультетшым тунем лекмем годым диплом пашам лийын. Театрыштына профессиональный труппо тырша, сай постановкым ойырен налме, гастрольышто лийме опытна кугу.
Российын культур министерствыжлан да министрже Ольга Любимовалан тауштымыж годым Константин Иванов палемден: театр мӱндыр регионлашке эреак шонымыж семын лектын ок сеҥе, но всероссийский гастроль да концерт программе мыланна тыгай йӧным пуа, а зритель тӱрлӧ театрын модмыжым мӧҥгыштыжак ончен кертеш.
Л.СЕМЕНОВА
