Йошкар-Ола гыч куштызо-влак Юл кундемысе «Kazan Bachata Festival 2019» фестивальыште мастарлыкыштым ончыктеныт, сеҥышыш лектыныт. Тушто Российын икмыняр регионжо гыч 300 наре еҥ участвоватлен. Тыгак Израиль ден Испаний гычат уна-влак лийыныт.
Конкурс деч посна участник-шамычлан «шӱдыр-влак» деч 12 шагаташ мастер-класс лийын. Йошкар-Олан чапшым «Ola Salsa», социальный куштымаш-влакын студийын тунемшыже ден преподавательже-шамыч араленыт. Нуно бачата дене эртаралтше тӱрлӧ фестивальыште, мастер-классым ончыктымаште лияшак тыршат.
Бачата – тиде Доминиканский Республикын музыкальный стильже, куштымашыже. Тудо поснак латиноамериканский эллаште кумдан вияҥеш.
Тыгай бачата фестиваль мастарлык дене палдараш, опытым погаш, школнам, оланам Россий, тӱнямбал кӱкшытыштє ончыкташ – сай йӧн. Тунемше-влакнан кушмышт коеш, – ойлен хореограф М.Фёдорова. – Ты шоу-группыш кумылан-влакым чумыраш увертаренна ыле. Эн тӱҥжє кушташ, участвоватлаш, сеҥаш кумылышт лийже. Вет куштымаште мотор постановко, хореографийым умылымо деч посна ӱдыр-влакым шке кумылым ончыкташ, музыкым шижын мошташ, тушто «илаш», лӱдмашым кораҥдаш да шкем сай результатлан кумылаҥдаш туныктена.
Участник-шамыч тўрлє ийготан, капан, южышт куштымо опыт деч поснат лийыныт. Лач тидыже социальный куштымашын ойыртемжылан шотлалтеш. Бачата, сальса, кизомба… куштымашке кумылан кажне еҥ ушнен кертеш, вет коллективыште кушташ тунемаш тӱҥалшыжат, тыгак идалык наре заниматлышыжат участвоватлен. Мутат уке, южыштлан куштылго, южыштлан нелырак лийын. Тӱҥжє – весела кумыл, атмосфер. А хореографийым шке шонена, ямдылена.
Бачата дене куштымаш фестиваль лўмлє куштышо, хореограф-влак дене палыме лияш, кутыраш, опытым погаш, йолташым муаш, куанаш, икте-весым умылаш, кеч жаплан ойыртемалтше вес тўняште лияш полша. Тыгодым тӱняончалтышыжат, умылымашыжат вашталтеш.
Йошкаролинке-влакым эн сай коллектив семын палемденыт. Тидыже синхронность, тўшкаште шукырак улмо (10 еҥ) дене кылдалтын. А ты куштымашым латиноамериканский социальный куштымашыш куснаш шонышо-влаклан сай ошкыл семын темлат. Теве мо оҥайже: ӱдыр-влак тушто шке моторлыкыштым, лывыргылыкыштым, ныжылгылыкыштым тичмашын почын пуэн кертыт.
Тыгеже кеч-могай куштымаш яра жапым пайдалын эртарыме эше ик сай йӧн.
Е.Эшкинина.
Йошкар-Ола гыч «Ola Salsa» куштышо группо.
