Шорык
Тиде арнян чылажат куштылгын пуалтеш. Тугай шижмашда шочеш, пуйто тыланда ала-кӧ полша. Но шканат йогыланыман огыл. Тендан деч еҥ-влак полышым, коллегыда-шамыч ой-каҥашым йодыт, чапда кушкеш. Чыла тиде ончыкыжым карьер тошкалтыш дене кӱзаш йӧным ышта.
Презе
Нине кечылаште тыланда кӱлешан икмыняр решенийым приниматлаш логалеш. Тидым мыняр чотрак келшен толшын ыштеда, шкендан веле огыл, воктеныда улшо еҥ-влакынат илышышт ончыкыжым тунар сайрак лиеш. Сандене ида вашке.
Йыгыр
Тыланда ешартыш пашам темлат але те иктаж-мом шонен муыда – кеч-мо гынат тиде арнян оксада шукемеш. Утларак жапым йочада-шамыч дене пырля эртараш тыршыза. Нунылан тиде моткочак кӱлмым кызыт поснак сайын умыледа.
Рак
Нине кечыла тыланда куанле лийыт, молан манаш гын чыла шонымашдам илышыш пуртен кертыда. Илыш корныштыда полшаш кумылан ала-могай еҥ вашлиялтеш. Тудо ончыкыжымат эше ик гана веле огыл тыланда кугу эҥертыш лиеш.
Лев
Шонымашым илышыш пурташ икымше ошыкылым лачшымак тиде арнян ышташ темлалтеш. Паша дене кылдалтше у вашлиймаш-влак вучат. Могай улмыда деч сайракын кояш ида тырше – чын чурийдам еҥ-влак садак ужыт. Тунам йӧҥдымылыкыш логал кертыда.
Ӱдыр
Тыршен пашам ыштыме деч вара шӱдыр-влак тыланда сайын каналташ темлат. Киношко, тоштерыш але эше иктаж-кушко миен толза, вет чонда кызыт ала-мом куанлым, кумылым нӧлтышым, моторым йодеш. Жапым пайдалын эртараш тыршыза.
Виса
Кызыт илышыште чылажат кумылдам вӱчка. Тидлан амалым тазалыкда пеҥгыде улмат ышта. Туге гынат утларак жапым шкет эртарыза, сайын каныза, вийым погыза. Шнуй верлашке миен толын, мудреч еҥ дене вашлийын, тудын деч ой-каҥашым йодын кертыда.
Скорпион
Тиде арнян лишыл еҥда-влак дене кумылым нӧлтышӧ вашлиймаш лиеш. Нунын кокла гыч шукынжо илышыштышт кугу рольым модмыдам умылат да утларак аклаш тӱҥалыт. Ала-могай уверым пален налыда, но тудо утыжым куанле огеш лий.
Пикшызе
Тиде арнян еҥ-влак кокла гыч ала-кӧ дене чот кылдалтше улмыдам шижыда. Уда койыш-шоктыш деч утлаш, мутлан, тамакым шупшмым чарнаш, шонеда гын, ты ошкылым ышташ кызыт йӧршынат куштылго огеш лий. Туге гынат мо утыла чучеш, тудын деч утлыман.
Ирказа
Ешыштыда шочмо гычак ӱй да мӱй лиеш. Такшым пелашда дене коктын гына жапым шукертсек пырля эртарен огыдал. Тыгай сай вашкылым ушкалымаш дене ида локтыл. Каныш кечылам пӧрт кӧргым эрыктымылан пӧлеклыза.
Вӱд йоктарыше
Тыланда ала-кушеч окса толеш. Родыда-влак куандараш шонен пыштат але вуйлатышыда вучыдымо премийым пуа. Пӧръеҥ-шамычлан шукырак оксам ыштен налшаш нерген вуйыштым пудыратылаш логалеш. Ӱдырамаш-влак еш дене жапым кузе пайдалын эртарышаш нерген шонкалаш тӱҥалыт.
Кол
Тиде арнян кумылым нӧлтышӧ ятыр сюрприз лиеш. Тыландат премийым пуат але тӱрлӧ вучыдымо пӧлек дене куандарат. Илышда сай велыш вашталтеш. Тургыжландарыше йодыш-влак шкештак кораҥдалтыт. Пашаште коллегыда-влак коклаште чапда кушкеш.
Ӱпым пӱчкаш тарваненда гын
29 январь. Таче ӱпым пӱчкаш огеш темлалт, молан манаш гын мом кузе ыштыме тыланда огеш келше. Ӱпым чиялташат сай кече огыл.
30 январь. Ӱпым пӱчмӧ деч вара тудо «колыштдымо» лиеш. Кӧ карьер тошкалтыш дене кӱзынеже, тудлан ӱпым натуральный чия дене чиялтыман.
31 январь. Прическым уэмдаш келшыше кече. Парикмахер деке миен толмеке, ӱп пеҥгыдемеш, кумылда нӧлталтеш. Ӱпым кеч-могай тӱсыш чиялтен кертыда.
1 февраль. Таче ӱпым пӱчмӧ деч вара утларак моторын кояш тӱҥалыда, илышда сай велыш вашталтеш. Ӱпым ошалге ден шӧртнялге тӱсыш гына чиялташ темлалтеш.
2 февраль. Тиде кечын ӱпым пӱчмеке иктаж кугу сатум налыда. Тыгодым уто нелытым погымо лӱдыкшӧ уло. Ӱпым натуральный гай тӱсыш чиялташ келшен толеш.
3 февраль. Ӱпым пӱчкашат, чиялташат келшыше кече огыл.
4 февраль. Ӱпым пӱчмылан кӧра тазалык тургыжландараш тӱҥал кертеш. Ӱпым натуральный гай койшо шемалге тӱсыш чиялтыме пашаште кугу кӱкшытыш шуаш полша.
Л.Камалетдинова