Общероссийский калык фронтын Марий Элысе пӧлкажын еҥже-влак регионын Транспорт да корно озанлык министерствышкыже Шернур посёлкышто илыше-шамычын йодмышт почеш лектыныт. А пашаже теве кушто. Кундемыште 2019 ий сентябрьыште у вокзалым почыныт. Тушто автобусым вучымо зал, кассе, туалет, буфет да водитель-влаклан каналташ пӧлем улыт. Калык тидлан нимучашдымын куанен, вет ынде автобусым йӱштыштӧ кылмен але йӱрыштӧ нӧрен вучаш огеш кӱл! Но куанлан вашке мучаш толын: пассажир-шамычым Шернур – Йошкар-Ола маршрут дене шупшыкташлан конкурсышто сеҥыше да тидын шотышто ойпидышым ыштыше перевозчик вокзалыш огеш пуро, калыкым ончычсо семынак посёлко мучко поген кудалыштеш.
«Поснак паша кечын эрдене неле. Калык я «Дары природы» кевыт, я военкомат воктене погына, да Йошкар-Олашке миен шумылан огеш ӱшане, молан манаш гын автобусышто але вер огеш код, але транспорт йӧршын огеш тол. Вокзалым почмо, но нимогай порядке уке», – вуйым шийыныт посёлкышто илыше-шамыч.
Шернур район администрацийын пашаеҥже-влак республикын Транспорт да корно озанлык министерствышкыже тиде йодыш дене ик гана веле огыл лектыныт. Перевозчик вокзалым почмо нерген пала, туге гынат ончычсо схеме денак пашам ышта. Тиде ситыдымашым кораҥдыме корно кызытеш икте гына – у оралтым район-шамыч кокласе маршрутлаште пассажир транспорт шогалме вер-шамыч реестрыш пурташ.
«Вокзал ынде пел ий пашам ышта. Мут толмашеш, тыгай чапле да йӧнан зданийлан моло районышто илыше-влак кӧраненат кертыт. А транспорт обслуживанийын качествыжым саемдыме шотышто министерстве велым эшеат нимом ыштыме огыл. Калыкын тургыжландарыше йодышыжым колаш кӱлеш шонена», – палемда ОНФ-ын регионысо штабшын сопредседательже Руслан Гизатуллин.
Калык фронтын еҥже-шамыч Шернур посёлкысо у вокзалым район-шамыч кокласе маршрутлаште пассажир транспорт шогалме вер-шамыч реестрыш пуртымо нерген йодмаш шотан обращенийым регионысо Минтрансыш колтеныт.
М.ИВАНОВА
