Ончыч Йошкар-Ола-Шап пелемарафон эртаралтеш ыле. Тӱрлӧ амаллан кӧра тудым чарышт, но йӧршеш огыл. Йошкар-Олашке кусареныт.
Теве ынде икмыняр ий почела пелемарафон Йошкар-Олан кечыжлан пӧлеклалтеш. Тений тудо 10 августышто лиеш. Организаторжо-влак: Йошкар-Ола администрацийын физический культур, спорт да молодёжный политикын управленийже, республикысе шымлыше-консалтинговый рӱдер да куржталаш йєратыше-влакын «Айвика» клубышт.
Участник-влаклан старт Чарла кремль воктене (Вознесенский урем, 58) пуалтеш. Тӱҥ дистанций – 21,1 километр. Кумылан-влак тыгак 10 да 5 километрыш куржын кертыт. Икымше гана ушнышо да почётан уна-влаклан скандинав коштмаш келшен толеш. Тудо «Царевококшайский полумиль» забег маналтеш. Кужытшо – 800 метр.
Тений пелемарафонын да «Царевококшайский полумиль» забегын участникше-влаклан шкешотан, «Й» буква форман медальым кучыктат.
Стартлан пакетым 9 августышто 10 гыч 20 шагат марте пуат. Почешрак толшо уна-шамыч тудым таҥасымаш кечын 7 шагатат 30 минут гыч 8 шагатат 30 минут марте налын кертыт.
Е.ЭШКИНИНА