Верлашке лектын, акым пуэн
30 май гыч 1 июнь марте, кум кече жапыште, Марий Эл Республикын эл кӧрго паша министрже полицийын генерал-майоржо Виктор Косарев 5 районысо отделын пашаж дене верлашке лектын палыме лийын.
Тудо Волжский, Звенигово, Оршанке, У Торъял да Морко районлашке миен коштын. Кажныштыже полиций отдел-влакын материально-технический базыштым, жаплан кучымо изоляторласе (ИВС) пӧлем-влакым, титаклыме да титаканлан шотлымо еҥ-влакым жаплан кучымо условийышт могай улмым, кузе пукшымым да малтымым, молым ончен савырнен, пашаеҥ-влак дене мутланен. Южыштыжо сӱретым сай велыш вашталтышашлан порученийым пуэн.
— Ончен лекмекше, Виктор Косарев отдел вуйлатыше-влак дене паша совещанийым эртарен. Тушто иктешлымашым ыштеныт да ончыкылан планым каҥашеныт, — палемдат ведомствын пресс-службыштыжо.
Л.Камалетдинова.
