УВЕР ЙОГЫН

107 йӱк дене сеҥен

 

13 июньышто Йошкар-Олаште «Единая Россия» партийын Марий  региональный отделенийжын XXII конференцийже эртыш.

Тушко партийын 17 верысе отделенийже гыч 122 делегат толын ыле.

Сайлымаш деч ончычсо партий кӧргыштӧ йӱклымаште кандидат семын Марий Эл вуйлатышын пашажым жаплан шуктышо Александр Евстифеев, «Марий национальный конгресс» республикысе мер толкынын председательже, Мер Каҥаш исполкомын еҥже, Йоча да самырык-влаклан марий театр-рӱдерын исполнительный директоржо Эдуард Александров, республикысе клинический больницын тӱҥ врачше Андрей Глазырин, Юл кундемысе кугыжаныш технологический университетын ректоржо Виктор Шебашев лийыныт.
Тайно йӱклымаште делегат-влак темлыме нине кандидат-влак кокла гыч иктым гына ойырен налын кертыныт.  Кузе йӱклымым республикысе Рӱдӧ  избирательный комиссийын председательже Ирина Татаринова эскерен.

Йӱклымашым иктешлыме деч вара пале лийын: ик бюллетень локтылалтын, шымытын Эдуард Александров верч йӱкленыт, кудытын — Андрей Глазырин верч, ик йӱкым Виктор Шебашевлан пуэныт. Эн шукын – 107 еҥ — Александр Евстифеев верч йӱкленыт.

Иктешлымаш деч вара «Единая Россия» партийын региональный отделенийжын секретарьже, Марий Эл кугыжаныш Погынын «Единая Россия» фракцийжын вуйлатышыже Владимир Мухин сайлыме кандидатым саламлыш. Александр Евстифеевым тыгак РФ Федеральный Собранийын Федераций-влак Советшын тӱнямбал паша шотышто комитетшын председательже Константин Косачёв саламлыш. Тудын палемдымыж почеш, йӱклымашын иктешлымашыже ӱшандарыше. Россий президент Владимир Путинын ыштыме ӱшанжым еҥ-влакат пеҥгыдемденыт. Тачысе решений – тиде сайлымаш компаний тӱҥалтыш веле, республикыште погынышо ятыр йодышым рашемдаш тӱҥалмаш манын ойлыш да Марий Эл вуйлатышын пашажым жаплан шуктышын палемдыме лектышыш шуаш шонымыжо, задаче-влакым сайлымаш пагытлан веле огыл, а кужу жаплан шындымыже келшымым палемдыш да сайлымаште, а тудо тений 10 сентябрьыште лиеш, ӱшандарышын сеҥаш тыланыш. Вашешыже Александр Александрович ӱшаным ыштымылан тауштыш да «Единая Россия» партийын Марий региональный отделенийжын делегатше-влакын темлымашышт — тиде кугу ответственностян  поручений манын палемдыш.

Любовь Камалетдинова.

Опубликовать в Одноклассники

Добавить комментарий