Фантастике ойлымаш
– Эргым, а кушто ӱдыретше? – аваже тура йодо. – Тӱнӧ кодын мо? Але пураш аптырана? Марлаже мутлана дыр?
Ачажат пеш вучымо шинчаончалтыш дене Антон ӱмбаке ончале.
– А-а-а, тудым эше погаш да зарядитлаш кӱлеш, – Антон шыргыжалын пелештышат, кугу чемоданжым почын, кӱварваке кок кужу йолым лутын пыштыш, почешыже – капым, вара кок кидлан келшыше наста-шамыч лектын возыч, пытартышлан ош ӱпан вуйым луктын пыштыш. Аваже шинчам пашкартен ончен шогылтеш, ачаже пелешташ ик мутымат ок му.
– О-о-о, тидыже могай-тыгай курчак? – йодо аваже. – Цирк гычак шолышт конден отыл чай?
– Манекенла коеш, – ачаже ешарыш.
– Тиде мыйын ватем, – умылтарыш эргышт. – Японий гыч йолташ-влак пӧлекленыт, нуно чылан тушто тыгай вате дене илат. Чыланжак огыл гынат, шукынжо.
– Мо-о? – шуйдарен йодо аваже. – Шанче тӱняштыда ынде чыландан ушда каен мо? – умылаш тӧчен, эргыжым ончен шога.
– Молан мылам чын ӱдыржӧ кӱлеш, каласе. Мый современный, кызытсе айдеме улам, – Антон аваже велыш савырныш. «Ватыжын» ужашыже-шамычым погаш пиже. Кокла капан айдеме кугытан чара курчак кынелынат шогале.
Алевтина БОГДАНОВА
Ойлымашым «Марий Эл» газетын 27, 29 номерлаштыже лудаш темлена. Лийза мемнан дене пырля!
Снимкыште – автор Алевтина Богданова.
С.Архипован фотожо.