23 майыште Марий Элым вуйлатыше Александр Евстифеев Чебоксарыште лийын. Тушто Россий Федерацийын Юл кундем федеральный округышкыжо пурышо да Китай Калык Республикысе Янцзы эҥерын кӱшыл ден кокла йогын кундемысе регион-влакын пырля пашам ыштымышт шотышто советын кумшо заседанийыштыже участвоватлен.
Тиде мероприятий Россий Федераций президентын Юл кундем федеральный округысо полномочный представительже Игорь Комаров ден КНР Кугыжаныш советын членже Ван Юнын вуйлатымышт почеш эртен.
Вашлиймаште Марий Элым вуйлатыше докладым ыштен. Тушто тудо Китайын регионжо-влак дене икте-весылан пайдалын пярля пашам ыштыме кылым вияҥдышашлан республикын вий-куатше ситышын уло манын палемден. Александр Евстифеев Марий Элын Китайлан мом темлен кертмыжым радамлен ончыктен.
Кок эл кокласе кыл койын пеҥгыдемеш. Теве Юрино поселкышто пырля ямдылыме инвестиционный проект почеш инструментальный вурсым ыштен налме заводым чоҥаш кутырен келшыме. Предприятий талукышто 5 тӱжем тонн вурсым пуышаш.
Марий Эл Республикым вуйлатышын организаций да аналитике виктемжын уверже негызеш П.ШАКИРОВ ямдылен
Д.Речкинын фотожо.
