Эртыше кечылаште Йошкар-Оласе икмыняр спорт сооруженийыште армийыш каяш ямдылалтше рвезе-влак коклаште черетан теле спартакиадыште регионнан тӱрлӧ кундемже гыч лу команде таҥасен.
Кок кече жапыште ончыкылык салтак-шамыч кирам нӧлтымаште, лӱйылтмаште, турникыште шкем нӧлтымаште, ече дене таҥасымаште вийыштым тергеныт. Икымше верым Волжский районын командыже налын. Кокымшыш Кужэҥер районын, кумшо верыш Советский районын командышт лектыныт.
– Ты гана рвезе-влак сай результатым ончыктеныт. Поснак Карай кыдалаш школышто тунемше рвезе-влакым мокталтыман. Лач ты школ гыч Павел Ипатов, 313 очком поген, спартакиадын абсолютный чемпионжо лийын, – ойла Волжский районышто физкультур да спортлан вуйын шогышо С.Михайлов. – Тудо турникыште 52 гана шкенжым нєлталын. Тыгак ты школ гыч Николай Тимофеев ден Данил Тимофеев сай результатым ончыктеныт.
– Павел Ипатов чыла шотыштат молодец, манаш келшен толеш. Моло конкурсыштат, мероприятийыштат вийжым терга, школын чапшым арала. Луымшо классыште улыжат кандаш йоча тунемеш. Тушечын нылытше – рвезе-влак. Шукырак лийыт гын, таҥасаш эшеат оҥайрак лиеш ыле, – манеш Карай кыдалаш школын директоржо Л.Сергеева.
Кеч-могай таҥасымаш умылыдымаш, ӱчашымаш деч посна ок эрте. Тыштат тыгак. Йошкар-Оласе «Арена» манежыште ик вере икмыняр команде турникыште вийым тергеныт гын, эше кок вере, кирам нӧлтен, патыр улмыштым ончыктен. Лач ты видыште участник-влак судья-шамычын чын але укежым шижыныт. Икте чыла шотыштат пеҥгыде лийын гын, вес судья изиш чаманенрак шотлен. Правил почеш кирам нӧлташ, тыгак турникыште шкем нӧлташлан 4 минут ойыралтеш.
Лӱйылташ 19-ше №-ан школын тирышкыже миеныт, а Корта ече базыште «салтак-влак» ечыгорнышто писе улмыштым тергеныт. Таҥасымаш умбакыже шуйна. Ончылно – кеҥеж спартакиаде. Тудыжо май мучаште эрта.
Е.Эшкинина.
