Уремыште XXI курым озалана гынат, кундемнан эше шагал огыл ялыштыже газ уке, сандене кы- зытат суртыштым коҥгаш олтен ырыктыше-влак кажне теле вашеш пум налме шотышто азапланат. Но нунын радамышт кажне ийын иземеш. Тений сентябрьыште республикнан ик эн мӱндыр кундемыштыже, Шернур районын куд ялыштыже, илыше-влакат, манмыла, цивилизаций деке лишемыт – «канде тул» нунын декат толын шуэш.
Тиде кугу паша Россий Федерацийын Ялозанлык да продовольствий министерствыжын ял кумдыкым вияҥдымашке виктаралтше да «Газпром» ПАО-н регионлаште газ пучым шупшмо шотышто программе-влак дене келшышын ышталтеш. Марий Эл Республикын правительствыж дене пырля газификаций йодышым решатлыме алгоритмым ыштыме. Тыге инвесторын средстваж кӱшеш кугу давлениян газ пуч да тиде жапыштак Россий Федерацийын Ялозанлык да продовольствий министерствыжын программыж почеш изи давлениян сеть чоҥалтыт. А пєрткєргысє оборудованийым калык шке кӱшеш шындышаш. Пырля ыштымылан кӧра Марий Элыште 2003 ий гыч илыме верлаш газ пучым пуртымо паша 23,2 процент гыч 75,6 процент марте кушкын, Шернур районышто – 76,9 процент марте. Тений палемдыме кундемыште кок объектым чоҥаш палемдыме.
Кызыт Аҥанур, Купсола, Ош Куп, Меке почиҥга, Оскан почиҥга, Кандрач почиҥга, Лари, Эпак да Куэр почиҥга яллаште илыше-влакын суртышкышт газ пучым шупшмо паша кая. Тиде объектым 18,2 миллион теҥгелан аклыме. Аукционышто аныклыме оксам – 1,49 миллион теҥгем – Аптулят, Кугу Пӱнчер, Изи Пӱнчер, Куракин, Кускин, Потасола, Чисола яллаш да Кукнур селаш «канде тулым» пуртымо пашаш колташ палемдыме. Ешартыш бюджет средства ойыралтеш гын, тудымат ты объектышкак кучылташ колтат. Тыге 2018 ийыште Шернур районышто газ пучын чумыр кужытшо 60 километр лиеш.
Г.Кожевникова.
