Каныме верна калыклан келша — канаш толыт. Толыт утларакше Татарстан велым, шкенан деч – шагалрак. Но вернаже сӧрал, вет каныме базе воктене — Олорка вӱд. Колым кучаш, йӱштылаш шонышылан пеш сай. Вержат экологий могырым яндар, илемнажат сай, кочкышымат тутлын ямдылена. Тений камин залым чоҥышна, кӱэшташ шонышылан кермыч коҥганат уло.
Ончыкыжо имне дене кудалышташ йӧным ыштынена. Шем мончам чоҥаш шонена – южышт тугайым утларак йӧратат. А ош мончанаже уло – капым луштараш пеш сай. Кава йымалсе тоштерым ыштыме шотыштат вуйым пудыратылына. Кунам-гынат лийын шуэш, шонем.
Марий калыкна пашам ыштен мошта, но ласкан каналташат жапым да йӧным муман. Сандене тидын нергенат шоналташ да каналташ толаш ӱжам. Калыкланна у шонымашым, у пиалым тыланем. Шке кундемдам пагалыза, йылмынам, тӱвыранам ида мондо. Таза лийза, У ий дене!
Е.С.Ямаев,
«Олорка» каныме верым вуйлатыше.
