Тений 6 октябрьыште Руш православный черкын Священный Синодшо Марий митрополийым ыштыме нерген пунчалым луктын ыле. Тидлан кӧра Святейший патриарх Кирилл Йошкар-Олан да Марий архиепископшо Иоаннлан митрополит саным пуэн.
Тидын дене кылдалтше черке йӱла 4 ноябрьыште Моско Кремльын Успенский соборыштыжо эртен. Тушто Российысе ятыр митрополийын митрополитше-влак лийыныт.
А 3 ноябрьыште Марий кундем дене кылдалтше историеш кодшо вес черке йӱла Переделкиныште, благоверный князь Игорь Черниговскийын храмыштыже эртен. Туштыжо Москван да Уло Русьын патриархше Кирилл Скопинский епархийын клирикше, архимандрит Феофан Данченковлан Волжский да Шернур епископын санжым пуэн.
