ЙӰЛА

Калык календарьым лышташлен

Калыкыште ты кечым шыдаҥым ӱдышӧ Елисей кече семын палат. Лачшымак таче эн вара шушо урлык шыдаҥым ӱденыт.

27 июнь (изарня). Катлыше тылзе Шорыкышто. Тиде начар лектышан шӱдыр пале (саска кече). Пакчаште шӱкшудым кӱраш, ураш, тӱрлӧ кушкылым шуэмдаш, пакчасаска йыраҥым шотыш кондаш, чер да шукш-копшаҥгым пытараш келшыше кече.

Садыште кукшо, черле укшым пӱчкеден кораҥдаш, ик вер гыч весыш кусарен шындаш, вожым колташ мландыш уралаш, вӱдым шаваш, ешартыш кочкышым пуаш, пасынковатлаш огеш темлалт. Изимӧр, кугымӧр йыраҥыште шуйналтше ӧрышым кораҥдаш тӱҥалаш лиеш. Вес вере кусарен шукемдаш сайракшым (пеленже палым ыштен) ойырен кодыман.

Емыж ден пакчасаскам кошташ, кылмыкташ пышташ, консервироватлаш тӱналме жап. Нӧшмым налын кодаш да эмлык шудым погаш келшыше кече.

Елисей кече дене кылдалтше йӱла ден пале-влак.

  • Тылеч вара писте эшеат чот пеледалташ тӱҥалеш.
  • Мардеж йӱдвел-касвелым пуалеш – йӱр да лавыртыш лиеш. Эрвелым пуалше писе мардеж черым конден кертеш, маныныт.
  • Агытан вуйым чӱчкыдын рӱза, ончыч але вараш кодынрак мура – игече локтылалтеш.
  • Каваште курныж-влак ӱлнӧ чоҥештылыт гын, кече ояр лиеш.
  • Ужава мландыште тӧрштылеш – йӱрым вучо.
  • Каваште тулсавыш модеш – игече вашталтеш.
  • Имне ойырешлен тарванылеш гын, шӱльӧ сайын шочеш.
  • Тумна муным мунчаш тӱҥалеш гын, лишыл кечылаште йӱр пура
  • Лудо, комбо когоклымыжым чарнен шыпланат гын, кӱдырчан йӱр толмым мужедыт.
  • Кечываллан каваште кугу шем пыл ик верыш чумыргат, тугеже каслан юж вӱдым погат.
  • Пембе кайык (зяблик) кужун да яндарын мура – сай игече шогаш тӱҥалеш.
  • Ты йӱдым шӱдыр-влак яндарын йӱлат – эрлашын ояр лиеш, чот чолгыжыт – кӱдырчан йӱр лиеш, йогат гын, мардежан игечым вученыт.
  • Шудышырчык молгунамсе деч чотырак тототла – лавыртышым конда.
  • 26 гыч 27 йӱдым ужмо омо яраш кодеш, ок шукталт маныныт. А эр велеш, кечывал лишан ужмо шукталтеш да тыланда осалым шонен коштшо еҥ гына конча манын шоненыт.

Р.ЧЕПАКОВА

Опубликовать в Одноклассники

Добавить комментарий