УВЕР ЙОГЫН

Кажне вер калыклан йӧнан лийшаш

Йошкар-Олаште, Сомбатхей кундемыште, Тазалык аллей – олаште илыше-влакын ик эн йӧратыме верышт. А кызыт тудо олаште илаш сай йӧным ыштыме шотышто программыш пурталтын да эшеат сылнырак лийшаш. Лишыл жапыште аллейыште 250 метр наре кужытан тротуарым ыштат, улшыжым, 800 метр кужытаным, шотыш кондат, теҥгылым, урным, 41 сӧрал светильникым, парклан келшен толшо тошкалтыш ден пандусым  вераҥдат, печым печат, канаш верым келыштарат. Тыгак газоным тӧрлат, 87 пушеҥге ден 1095 вондым, пеледышым шындат, аллей воктене шке семын кушшыштым руат. Тӱрыс пашан акше 25 238,86 теҥгешке шуеш.

Республик вуйлатышын пашажым шуктышо Александр Евстифеевын Йошкар-Олан мэрже Евгений Маслов дене кодшо шуматкечын Йошкар-Ола мучко савырнымышт годым тышкат пурен лектыныт. А.Евстифеев подрядчикын пашаштыже ситыдымашым ужын.

— Урно-влак улыт, но нуным эртыме корно деч торашке вераҥденыт – лишеммат огеш шу. Йоча площадкыште шудо кушкын. Модмо верыш шарышашлан але вара республикыште ошма шагал? – йодын тудо олан мэрже деч.

Тыгак А.Евстифеев аллей кумдыкым шотыш кондаш лишыл жапыште субботникым эртараш да тудым эшеат вияҥдышаш проектлан конкурсым увертараш темлен.

Чоҥымо паша, илыме вер да коммунальный озанлык министрын пашажым шуктышо Михаил Леонтьев тиде чынже денак тазалык вер лийшаш манын палемден. Еҥ-влак йолын, ече дене коштын, велосипед дене кудалыштын, коньки, ролик дене мунчалтен кертышт. Ужалыме верлаште алкоголян йӱыш лийшаш огыл, калыклан сокым, вӱдым, пурам да мороженыйым гына темлыман манын каласен. Тыште туалет, порядкым эскерыме пункт да пӱтынь аллей кумдыкышто яра  Wi-Fi лийшаш манын. Эше мом ышташ лийме шотышто калык дене каҥашаш кӱлмӧ нерген ойлен.

Тазалык аллейыште пашам шушаш шошым тӱҥалаш палемдалтеш.

* * *

Тиде кечынак А.Евстифеев кӱртньыгорно вокзалыште лийын. Тушто кӱртньыгорно гоч йолешке-влаклан ыштыме у кӱварым ончен савырнен.

Чоҥымо паша 2014 ийыштак тӱҥалын. Тудын акше 300 млн. наре теҥгешке шуын.  

— Тиде кӱварым мыланна кӱртньыгорно пашаеҥ-влак пӧлекленыт. Ме пашам лийжак манын, курымлан ыштымым ужына. Ола ден республиклан ыштыме тыгай пӧлеклан РЖД-лан тау, — каласен А.Евстифеев.

Кӱварым 8 сентябрьыште пашаш колтеныт.  

Умбакыже тудо вокзал кумдыкым ончен савырнен да тушко, поснак Яналов ден Гагарин проспект кокласе ужашыш, вашталтышым пурташ кӱлмым палемден. Республик вуйлатышын пашажым шуктышо Промышленность, транспорт да корно озанлык министерстве ончылан пассажир ден перевозчик-влаклан йӧнан да лӱдыкшыдымӧ верым ыштышашлан вокзал воктенсе кумдыкым вияҥдыме проектым ямдылаш задачым шынден. 

Л.Камалетдинова.

 

Опубликовать в Одноклассники

Добавить комментарий