Марий Йӱштӧ Кугызанан ынде шке илемже уло! Тудым 17 декабрьыште Шернур район Кукнур кундемыште официально почыныт. Юзо шӱлыш дене авалталтше йомак чодыраште Йӱштӧ Кугыза ден Лумӱдыр деч посна юзо корнышто икмыняр алан ышталтын. Кукнурысо культур каныме пӧртын пашаеҥже-влак тиде сомыллан июль гыч кыртмен пижыныт. Шукертак вучымо пайрем дене саламлаш Марий Элын культур, савыктыш да калык паша шотышто министрын алмаштыже Галина Ширяева, Шернур район администрацийым вуйлатыше Александр Кугергин, Йошкар-Оласе Кукнур землячествын еҥже-влак миеныт. Тыгак молодежный политике, спорт да туризм министерствын, республикысе калык усталык рӱдерын, районысо культур пӧлкан пашаеҥже, Кукнур кыдалаш школын тунемшыже-влак, верысе калык чумыргеныт.
Йӱштӧ Кугыза юзо йомак корныж дене коштыктымо жапыште уна-влакым Вувер кува авырен, Овда ден Киямат ӱдырын илыме лапыштыштат чарак вучен…
Республикыштына марий Йӱштӧ Кугыза шкешотан бренд лийшашлык нерген шонымаш икымше гана 2012 ийыште йоҥгалтын. Тӱрлӧ амаллан кӧра паша эркышнен. Ты проектым 2018 ийлан «Марий Элын кугыжаныш национальный политикыже» кугыжаныш программыш темлыме дене паша тарванен. Тений район вуйлатыше-влакат проектым умылен вашлийыныт. Александр Викторович тудым илышыш шыҥдараш ушнышо-влаклан тауштен да Кукнур ял шотан илемын историйыштыже у йыжыҥлан тӱҥалтыш ышталтмым палемден. Министрын алмаштышже Галина Степановна тиде проект республикысе тӱрлӧ калыклан веле огыл, тыгак тӱнямбалне илыше чыла марийлан, моло еҥлан юзо шӱлышан вер семын лийже манын тыланен.
Арам огыл, очыни, марий кокла гыч икымше марий профессиональный шымлызе фолькористна К.Четкаревын (тидын нерген историк Р.Бушков воза) илыш корныжым ончалан гын, тидым пеҥгыдемден каласаш лиеш. Ксенофонт Архипович 9 ияшыж марте Кукнур кундемысе Нурмага ялыште коча-коваж дене илен. Лачак кова деч колыштмо йомакше-влак тудлан илыш мучко шуктымо пашалан эҥертыш лийын огыл мо?
Йӱштӧ Кугызан илем кумдыкыштыжо марий калыкын кечышотшо почеш пайрем ден йӱла кече-влакымат палемдаш тӱҥалыт. Немда эҥер вӱдыштӧ йӱштыл лекташ, верысе памашла гыч вӱдым, эсогыл Ӱжарасе минеральный вӱдым подылаш, пӱнчерыште яндар юж дене дене шӱлалтен кошташ йӧн уло. Адакше ты илем гыч Чумбылат курык марте улыжат 25 уштыш гына. Тылеч посна Кукнур кундем — Йошкар Пеледыш пайремлан негызым пыштыше сотемдарыше да писатель А.Конаковын, йомакым чумырышо шымлызе К.Четкаревын, МАССР-ын калык артистше И.Россыгинын, моло лӱмлӧ эҥын шочмо кундемже.
Йомак тӱнялан ӱшаныше оксан еҥ-влак полшаш кумылан лийыт гын, ончыкыжым тыште мончат, малыме верат чоҥалтшаш улыт. А Кукнур калыклан, тусо культур пашаеҥ-влаклан чон шокшыштым, поро кумылыштым ончыкыжымат арален кодаш тыланем. Тек тиде проект Кукнур кундемлан вияҥаш эҥертыш лиеш.
Светлана ПЕХМЕТОВА.
Авторын да А.Ивановын фотошт
