Марий Элым вуйлатыше Юрий Зайцевын темлыме «Инициативы жителей» проект шотышто мер каҥашымаш йыжыҥ мучашлалтын.
1 июнь гыч 15 сентябрь марте республикыште еҥ-влакын 467 погынымашышт лийын, тушко 36 986 еҥ ушнен. Эн шуко вашлиймашым Медведево ден Советский районлаште эртареныт. Участник-влакын чотышт Йошкар-Олаште да Волжск округышто утларак лийын.
Еҥ-влак 127 темлымашым ыштеныт. Нунын коклаште – Звенигово районышто скверым тӱзаташ, У Торъял муниципал округышто Крешын Руй ялыште йоча площадкым ышташ, Кужэҥер муниципал округысо Йӱледӱр селаште памашым шотыш кондаш, Морко районышто Элым аралыше-влаклан обелискым вераҥдаш, Советский район Кукмарий ялыште кеҥеж эстраде аланым ышташ, Юрино поселкышто Парковый уремыште уремым волгалтараш.
Кызыт муниципал образованийлашке пурышо йодмаш-влакым ойыркалыме йыжыҥ эрта. Таче гыч, 15 октябрь гыч, республиканский этап тӱҥалын. Эн сай инициативе-влакым илышыш пурташ 2027 ийыште республикын бюджетше гыч 100 миллион теҥгем ойыраш палемдыме.
Нине темлымаш-влак вес ийын Марий Элым вуйлатыше Юрий Зайцев ден «Единый Россий» партийын полшымышт дене шыҥдаралтыт.
Любовь Камалетдинова
