Кодшо каныш кечылаште да тиде арня тӱҥалтыште республикысе корнылаште 4 ДТП лийын. Тушто 16 еҥ эмганен.
22 мартыште эрдене 5 шагатат пеле наре гутлаште Советский районышто, Йошкар-Ола – Уржум кугорнын 41-ше километрыштыже, транспорт дене пайдаланаш правадыме 26 ияш рвезе Volkswagen машина дене утыждене писын кудалын да, рульым кучен кертын огылат, ваштареш полосашке лектын. Тушто ПАЗ автобус дене тӱкненыт. Туткарыште иномаркын водительже, автобусын 9 пассажирже сусыргеныт.
Тиде кечынак 9 шагатат пеле наре жапыште Волжский районышто, Йошкар-Ола – Зеленодольск кугорнын 87-ше километрыштыже, Volkswagen машинам виктарыше 61 ияш ӱдырамаш вес полосашке лекмыж годым шекланен шуктен огыл да прицепан Mercedes машина дене тӱкнен. Тылеч вара ваштареш полосаште кок Лада Калина дене керылтын. Туткарыште иномаркын ӱдырамаш водительже, икымше Лада Калинам виктарыше ден кокымшо Лада Калина машинаште лийше 11 да 78 ияш пассажир-влак сусыргеныт.
Республикысе корнылаште йӱшӧ водитель-шамычын титакыштлан кӧра идалык тӱҥалтыш гыч але марте 12 ДТП лийын. Туткарыште 1 еҥ колен, 15 еҥ эмганен.
Водитель, йолешке, корно движенийын моло участникше-влак ӱмаште чылаже 520 миллионат 609 тӱжем теҥге штрафым тӱленыт.
2024 ийыште 12 тылзе жапыште республикыште корно правилым 1274780 гана пудыртеныт. Тидыже 2023 ийысе дене таҥастарымаште 12 %-лан шукырак лийын. Ӱмаште суд 1290 еҥым транспортым виктараш права деч посна кодаш пунчалым луктын, судын пунчалже почеш 315 еҥым арестоватленыт.
Мессенджерыште файлым почмышт дене республикыште илыше 3 еҥ кодшо кечылаште чылаже 250 тӱжем утла теҥгешт деч посна кодыныт.
Полицийыш Шернур район гыч 51 ияш пӧръеҥ йыҥгыртен да палыдыме еҥ деч смс толмо нерген каласен. Смс мучаште йодын возымо улмаш: «Тыйын фото?» Пӧръеҥлан оҥайын чучын да файл-влакым почын. Тыге, телефоныштыжо улшо приложений-шамыч дене пайдаланен, мошенник тудын кредит картше гыч 200 тӱжем утла теҥгем палыдыме счётлашке колтен.
Тыгай йӧн денак Йошкар-Ола гыч 43 ияш да Морко район гыч 35 ияш ӱдырамаш-влак 44 тӱжем утла теҥгелан ондалалтыныт.
17 гыч 23 март марте Марий Элыште 28 вере пожар озаланен. Нунын кокла гыч 10 – шӱкшудо йӱлымаш.
Эн шуко, 7 азап, Йошкар-Олаште, 5 туткар Медведево районышто, 3 – Козьмодемьянск олаште, Килемар да Волжский районлаште, 2 – Курыкмарий районышто, 1 гыч Волжск олаште, Юрино, У Торъял да Оршанке районлаште лийын.
Шошо шумо дене еҥ-влак лум йымач лекше да кошкышо шудым, шӱкшакым йӱлалтат. Тидыже кугу туткар марте шуктен кертеш. Тыгак йӧртыде кодымо тулото, кудалтыме тамак, шырпе азапым ыштат.
Кодшо кечылаште Юрино район Юркино посёлкышто ик пӧръеҥ шке мланде кумдыкыштыжо кукшо шудым йӱлалташ тӱҥалын. Икмыняр жап гыч тул мончашкыже куснен. Пиалеш, кӱчык жапыште толын шушо пожарный-влак оралтым арален коден шуктеныт.
Курыкмарий район Озёркадӹр ялыштат кукшо шудым йӱлалтеныт. Тулын «корныштыжо» трансформаторный подстанций лийын да тудо изиш гына тушко куснен огыл! Йӧра, пожарный-влак жапыштыже толын шуыныт да авырен кертыныт.
МЧС ушештара:
- Кукшо шудым ида йӱлалте, шудылыкышто тулотым ида ылыжте, йӱлышӧ тулым эскерыде ида кодо. Тамак пундашым да йӱлышӧ шырпым йӧртен кудалтыза;
- пожарым ужында – эртен ида ошкыл. Тул ылыжме нерген лесничествыш але пожар охраныш увертарыза;
- йӧртымеке, тул угыч ылыжме лӱдыкшым тӱрыс пытарымешке, ты вер гыч ида кай.
Любовь Камалетдинова
Фотом республикысе МВД-н соцкыл лаштыкше гыч налме
