28 март гыч 2 апрель марте Мурманскыште «Праздник Севера» 83-шо традиционный тӱнямбал пайрем – ече дене таҥасымаш эртен.
Тушко Звенигово ола гыч республиканский категориян судья Инна Геннадьевна Ситниковам пашам ышташ ӱжыныт.
Каласкалымыж почеш, таҥасымаште Россий, Франций, Германий, Беларусь Республик гыч чылаже 1200 наре участник вийжым терген. 29 мартыште классике йӧн дене 15 километрыш куржыныт. Тушко Марий Эл гычат кок ечызе миен. Йошкар-Ола гыч Станислав Егоров (1992 ийыште шочшо) 3-шо верым сеҥен налын да спорт мастер нормативым шуктен. Йошкар-Ола гычак Николай Васильев (1998 ийыште шочшо) спорт мастерыш кандидатын норматившым шуктен. Эрлашыжым коктынат 10 километрым эрыкан (свободный) стиль йӧн дене эртымашке ушненыт.
Сайын пашам ыштымыжлан, тиде пайремым эртарымаште полышым пуымыжлан да тушто луымшо ий судьялан тыршымыжлан Мурманск областьысе комитет председатель С.И.Наумова И.Ситниковалан Тауштымашан серышым кучыктен.
Тыгай торашке миен толаш окса полышым пуымыштлан судья И.Ситникова «Звениговский мясокомбинат» ООО-н генеральный директоржо Наталья Казанковалан да Кугыжаныш Думын депутатше Сергей Казанковлан кугу таум ойла.
Л.Камалетдинова.
