УВЕР ЙОГЫН

Йошкар-Олаште «Шолшо точко» эрта

Марий Эл вуйлатыше А.Евстифеев «Шолшо точко» мероприятийым почмаште лийын. Тудо 20-21 сентябрьыште Марий кугыжаныш университетын Паша рӱдерыштыже  Марий Эл правительствын, Стратегий инициативе агентствын, республикысе бизнес-сообществын полшымышт дене эртен. Тушто республикысе правительствын, Стратегий инициативе агентствын, Сколковский образований да бизнес структур, науко да технологий институтын еҥже-влак лийыныт, увертара Марий Эл вуйлатышын организаций да аналитике виктемже. 

Мероприятийыште республикнан социальный ден экономике илышыжым вияҥдаш полшышо тӱрлӧ шонымашым, проектым илышыш шыҥдарыме нерген кутыреныт. Республик вуйлатыше «Образований миграций: ӱжмаш ден эн сай практике» пленарный заседанийыште каласен: «Марий Элысе вуз-влаклан йот элысе студент-влакым туныктымо йодыш кӱлешан. Ме самырык тукымлан, университетлан полышым пуаш ямде улына».

«Шолшо точко» икымше гана 2014 ийыште Москваште эртен. Таче кечылан тыгай сынан площадке элнан икмыняр олаштыже пашам ышта. Мутлан, Санкт-Петербургышто, Новосибирскыште, Томскышто, Калугышто, моло вере.

Тиде площадке самырык-влаклан шке шонымашыжым, поектшым илышыш шыҥдараш полшышаш. Тидлан ынде Москваш але вес олаш кайыме огеш кӱл. Идалык мучаш марте тыгай «точкым» элыште эше икмынярым почыт.

Л.ШАБДАРОВА.

Опубликовать в Одноклассники

Добавить комментарий