Ялозанлык да кочкыш сату министерствын данныйже почеш, тений Марий Элыште 17812 гектар кумдыкышто кормалык культурым солышаш улыт.
24 июньлан тиде пашам эн чулымын Медведево районышто шуктеныт. Тушто 3770 гектарыште соленыт. Кокымшо верыште – Шернур район (2992 га.). Кумшо верыште – У Торъял район (2479 га.) Оршанке рай онышто почешрак
кодмо палдырна. Тушто кормалык культурым 301 гектарыште веле соленыт. Волжский районышто ты сомылым 752 гектарыште шуктеныт.
Озанлыклаште телылан шудым ямдылат. Тиде шотыштат кызытеш Медведево район эн ончылно кая. Тушто палемдыме 5813 тонн гыч 327 тонным ыштеныт. Кокымшо верыште – Шернур район: 3300 тонн гыч 218 тонн ямде. Кумшо верыште – Морко район. Тысе озанлык-влак палемдыме 2730 тонн гыч 140 тонн шудым ыштеныт.
Шудо массым ыштымаштат Медведево районышто чулымын тыршат. Планыште 18110 тонн лийын, а ямдыленытше 22134 тонным. Тыге ты пашам 122 процентыште шуктеныт. Кокымшо верыште – У Торъял район. Палемдыме 51049 тонн гыч 9304 тонным ыштеныт. Марий Турек район изишлан гына почеш кодеш. Тусо озанлыклаште 17660 тонн гыч 9200 тонн ямде.
Силосым ыштымаште икымше верыште – Шернур район. Палемдыме 37700 тонн гыч 10947 тонным оптеныт. Кокымшо верыште – Кужэҥер район (26580 тонн гыч 5140 тонным ямдыленыт). Кумшышто – Звенигово район (47518 тонн гыч 4810 тонн ямде). 24 июньлан пӱтынь республик мучко ты пашам 7 процентыште шуктымо. Ӱмаште тиде кечылан 31 процентыште ыштыме лийын.
Пакчасаскам ончен куштышо-влакынат – тургым жапышт. Южыштын пакчасаскашт эсогыл ужалашат ямде. Мутлан, Медведево район Пиясир селаште илыше Анатолий Егоровым налаш. Марий Турек районысо Нартас ялозанлык техникумым тунем пытарен да да шке жапыштыже Медведево районысо Ленин лӱмеш колхозышто тӱҥ агрономлан пашам ыштен. А кызыт шке пакчаштыже тӱрлӧ сорт ковыштам, кешырым, йошкарушменым … кушта. Теве суперранний манме «Парел» гибрид сорт ковыштаже шуын. Тудым фермер кевытлашке ужалаш колтылеш.
Л.Камалетдинова
Снимкыште: пакчаште изижат, кугужат тыршат.
И.Речкинын фотожо
