Ме, айдеме-шамыч, чодырашке емыж-саскалан, понгылан, молылан коштына гын, южгунамже янлык-шамычат, «а те, еҥ-шамыч, кузерак иледа?» маншыла, пуйто ончал савырнаш шонен, илемлашке толын каят.
8 июньышто эр эрдене шордо-шамыч Йошкар-Олашке «унала» толыныт. Нуным, чылаже кум янлыкым, еҥ-влак эн ончычак Строитель-влак уремыште ужыныт. Тиде 4 шагат эрденак лийын. Тылеч вара Соловьев да Крылов уремлаште коштмышт нерген пале лийын.
Южышт, уждымым ужмо семын, нуным фотографироватленыт да Интернетыш вераҥденыт, шкеныштым кузе кучымышт нерген каласкаленыт.
Ужшо-влакын ойлымышт почеш, шордо-шамыч еҥ-влак деч лӱдыт. Нуным ужын, чарнен шогалыт да ончен шогат. Еҥ-шамычат шкеныштым тӱрлӧ семын кученыт. Иктышт, янлык-влакым ужын да лӱдын, нуным тора гыч эртен каеныт, весышт ваштарешыштак ошкылыныт.
Крылов уремыште гын пий-шамыч изи шордым завод кумдыкыш «поктен пуртеныт». Тудо шуркалыше воштырыш логалмыжлан кӧра сусырген. Туге гынат, пече гоч вончен кертын да вондер коклашке каен, палдара ик ужшо еҥ.
Л.Камалетдинова.
