Филологий науко доктор, марий йӱлам шымлыше Любовь Абукаева «Кудо» конкурсым кокымшо ий жюри еҥ семын акла, сандене ӱмашсе дене таҥастарымаште, тений могай ойыртем палдырныме да могай тыланымашыже лийме нерген йодна.

— «Кудо» конкурслан район-влакын ий гыч ийыш сайынрак ямдылалташ тыршымышт шижалтеш. Шукынжо шке кундемысе, тыгак мондалташ тӱҥалше пайрем ден йӱлам ончыктеныт. Мутлан, Шернур районын ончыктымо «Семык» пайремыште шуктымо йӱла-влак мыламат специалист семын пален налаш моткочак оҥай да пайдале улыт ыле. Сандене тошто йӱлам шымлымыштлан, арален кодымыштлан да весе-влакым палдарымыштлан район-влаклан таум гына каласыме шуэш. Вет тӱҥжӧ йӱлам жюрилан ончыктымаш огыл, а эн шергыже — арален кодымаш.

Тений кудо-влакым келшен толшын вераҥдымым палемдыме шуэш. Кажныж воктене вер ситышын лийын да ты але тудо районын шочшыжо-влак кудо-влак ончылно икте-весышт дене вашлийын мутланен, пырля куштен, мурен кертыныт. Пайремже вет жюри ден кугу уна-шамычлан огыл, а калыклан эртаралтеш.

Тыланыме семын тидым веле каласынем: тек район-влак конкурслан лийжак манын, идалык мучко ямдылалтыт, шке кундемысе йӱлаштым шымлат. Но тидым адакат тек жюрилан йӧраш тӧчен огыл ыштат, а эн ончычак шканышт оҥай лийшаш. Тек конкурслан ямдылалтмашке да йӱлам ончыктымашке самырык-шамычым утларак ушат.   

М.Скобелевын фотожо.