Параньга районысо Ляжмарий ялыште илыше Татьяна Степановна Соколова 21 декабрьыште 101 ияш лийын.
Лӱмгече озам Марий Элын социальный вияҥмаш министржым алмаштыше Дмитрий Солдатов, Параньга муниципальный районым вуйлатыше Любовь Михеева да Параньга районысо Калыкым социально обслуживатлыме комплексный рӱдерым вуйлатыше Лилия Галиуллина саламленыт, Татьяна Степановналан Марий Элым вуйлатыше Александр Евстифеевын саламлымашыжым, пеледыш аршашым да шарнымашан пӧлекым кучыктеныт.
Тылын труженикше, пашан ветеранже Т.Соколова шочмо кечыжым йочаже, уныкаже-шамыч, уныкаже-влакын йочашт, родо-тукымжо да лишыл еҥже-шамыч дене палемден.
Татьяна Степановна – Марий Турек кундемын ӱдыржӧ. Тудо шуко йочан ешыште шочын. Школым тунем пытарен кертын огыл – ача-авалан озанлык коклаште полшаш кӱлын.
1943 ийыште Сталинградым тушман деч утарымеке, комсомол путёвко дене олам эрыкташ каен. Мӧҥгыш пӧртылмекше, 1946 ийыште Ляжмарий ял качылан, фронтовик Евдоким Яковлевичлан марлан лектын. Вате-марий Соколовмыт 49 ий пырля иленыт, куд йочам ыштеныт, кажныжым йол ӱмбак шогалтеныт.
Татьяна Степановна ӱмыржӧ мучко ялозанлыкыште пашам ыштен: доярке гыч ферме вуйлатыше марте кушкын. 1969 ийыште сулен налме канышыш лектын.
Кужу ӱмырын секретшым йодмылан ӱдырамаш моткоч простан вашешта: «Йочам-влак верч илем, нунат мыланем тыгакак вашештат».
Татьяна Степановнам меат шокшын саламлена да пеҥгыде тазалыкым тыланена.
М.ИВАНОВА
Фотом Марий Элын Социальный вияҥмаш министерствыжын сайтше гыч налме
