Тӱнямбал экономике форум
Банк дене партнёр кыл
Экономике форумышто эн ончычак Марий Эл правительстве ден «Альфа-Банк» АО коклаште соглашениеш кидпалым пыштыме.
Юрий Зайцев палемден: банкын пашаштыже ик тӱҥ корно предпринимательствылан полшымо дене кылдалтын. Финанс структур – паша сообществын еҥже-влаклан ӱшанле партнёр. Изи да кокла кугытан предпринимательствым кредитоватлымаш тений икымше кварталыште ӱмашсе тыгаяк жап дене таҥастарымаште 84 наре процентлан кушкын.
«Банк Промышленностьым вияҥдыме фонд, «Мыйын бизнесем» рӱдер дене чолган пашам ышта, соцпроектлам шуктен толаш полша», – каласен Марий Эл вуйлатыше.
Банк дене соглашенийым пеҥгыдемдымаш кундемым социальный да экономике могырым вияҥдыме дене кылдалтше кугыжаныш программылам да инвестиций проектлам шукташ, жаплан келшыше банк технологий ден инфраструктурлам шыҥдараш полша.
Соглашенийым пеҥгыдемдыме дене пырляк партнёр кылым умбакыже вияҥден толмо нерген йодышым каҥашыме.
Марий Эл вуйлатышын пресс-службыжын уверже негызеш Юрий Исаков ямдылен.
Снимкыште: «Альфа-Банк» АО дене соглашенийым пеҥгыдемдыме.
Денис Речкинын фотожо.
