КУЛЬТУР ДА ИСКУССТВО

Йоча-влакын мастарлыкышт кумылым нӧлтыш

2 мартыште Э.Сапаев лӱмеш опер да балет академический театрыште республикын Тӱвыра, савыктыш да калык пашаш шотышто министерствыжын коллегийжын кумдаҥдыме заседанийже эртыш.

Эн ончычак ме 2019 ийыште республикыштына тӱвыра да сымыктыш аланыште ыштыме паша, лийше событий нерген ушештарыше, тыгак «Культур» национальный проект шукталтме нерген кином ончышна.

Тиддеч вара культур министр Константин Иванов 2020 ийыште министерствын шуктышаш пашаж дене палдарыш.

— 2020 ийыште «Кугу афише» проект умбакыжат пашам ышташ тӱҥалеш.  9 майыште, Сеҥымаш кечын, Сапаев лӱмеш опер да балет театрыште кугу пайрем концерт лиеш. Тушто чумыр марий йоча  хор всемарийский калык семӱзгар ден симфонический оркестр-влакын шоктымышт почеш мура. А Благовещений башне воктенсе площадкыште Сеҥымаш кечылан пӧлеклалтше мероприятий лиеш, — палдарыш Константин Анатольевич. — Калык лӱмым нумалше профессиональный коллектив-влаклан 26 апрельыште «Семнадцать мгновений весны» фестиваль эртаралтеш. Участник-влак Чарла Кремльыште мастарлыкым ончыктат. Тиде проектым илышыш пурташ республикысе Театр пашаеҥ-влакын ушемыштын Россий президентын грантшым сеҥен налмыже полша.

Лӱмгече дене кылдалтше мероприятийлан республикысе тоштер-влакат тыршат. Нуно сар илышым почын ончыктышо экспонатым вераҥдат, у выставке-влакым ямдылат. Архив-влакат патриотизм шӱлышан «Память о войне — хранить вечно» акцийым, «В архивной памяти мгновения войны» архив лудмашым эртарат.

— Тений Шереметьевмыт замкыште уэмден олмыктымо паша ышталтшаш, тыгаяк паша Евсеев лӱмеш национальный тоштерыште, Козьмодемьянск оласе библиотекыште шукталтшаш, — ешарен министр.

Тиддеч вара Марий Эл правительстве председательын икымше алмаштышыже Михаил Васютин культур аланыште пашам ыштыше-влакым шкенжын да Марий Эл вуйлатыше Александр Евстифеевын лӱмжӧ дене саламлыш да икмыняр еҥлан Чап грамотым, Таумутым кучыктыш. А тӱвыра аланыште кужу жап тыршен да сайын пашам ыштымыштлан Венера Бакланова ден Фелицита Эшмяковам «Марий Эл культурын сулло пашаеҥже» лӱм дене палемдалтыч.

Погынымашым кугу концерт мучашлыш. Калык семӱзгар дене шоктышо Чумыр марий йоча оркестр почеш Чумыр марий йоча хор руш да марий композитор-влакын мурыштым мурыш.

Алевтина БАЙКОВА

М.Скобелевын фотожо

 

Опубликовать в Одноклассники

Добавить комментарий