ОБРАЗОВАНИЙ

 «Илышыште эре икымше лийза!»

29 июньышто Йошкар-Оласе Ната (Надежда) Бабушкина лӱмеш скверыште юнармеец ден кадет, спортсмен, нунын ача-авашт, туныктышо-влак погыненыт. 22 июньышто нине ӱдыр-рвезе-шамыч икымше гана парашют дене тӧрштеныт, а ты погынымаште самырык спортсмен-влаклан  парашютистын значокшым, дипломым кучыктеныт. Но ты торжественный ужашыш кок  кадет толын кертын огыл, нуно военный училищыш экзаменым кучаш каеныт.

21-ше №-ан школ пеленсе «Икар» военно-патриотический клуб ден 4-ше №-ан гимназийын кадетше-шамыч Ната Бабушкинан бюст воктекыже пеледышым пыштеныт.

— 1936 ий 27 июньышто Ната Бабушкина колен. Кажне ийын тудын бюстшо воктеке пеледыш аршашым пыштена, тале спортсменкым шарналтена, –маньыч Россий ДОСААФ-ын Йошкар-Оласе пӧлкажым вуйлатыше Александр Поспехов  ден «Юнармий» НОД-ын штабшым вуйлатыше  Александр Махачев.

Вара Йошкар-Оласе авиационно-спортивный клубым вуйлатыше Зуфар Сафин  самырык юнармеец-влакым саламлыш: «Тек икымше гана парашют дене тӧрштымыда ӱмырешлан шарнымашеш кодеш. Нимо деч ида лӱд, сайын тунемза, илышыште эре икымше лийза, элнам аралыза, Марий Эл Республикын чапшым ида волто.  Аэроклубна  35 спорт мастерым, тӱнямбал кӱкшытан ик спорт мастерым куштен.  «Русские Витязи» авиационный пилотажный группым вуйлатышын алмаштышыже, мемнан землякна Алексей Котомкин, тендан семын Йошкар-Оласе ДОСААФ-те тунеммыж годым самолёт дене южыш икымше гана нӧлталтын. Кызыт тудо «Боинг» пассажир самолётым виктара. Спорт мастерын кандидатше Ольга Сысоева 500 гана парашют дене тӧрштен».

М.СКОБЕЛЕВ.

Авторын фотожо. 

Снимкылаште:  Аэроклубын вуйлатыше З.Сафин кадет В.Шестаковлан  дипломым кучыкта

 

Опубликовать в Одноклассники

Добавить комментарий