Йошкар-Оласе М.В.Ломоносов лӱмеш лицейыште ача-ава-влаклан республик кӱкшытан погынымаш лийын. Тушто кок секций – «Ача-авалан ЕГЭ» да «Еш образований» – пашам ыштен.
Икымшыште 40 участник погынен, нунын коклаште Марий Эл Правительстве председательын икымше алмаштышыже М.Васютин, образований да науко министр Н.Адамова, Юл кугыжаныш технологический университетын ректоржо В.Шебашев да 11-ше классым тунем пытарыше-влакын ача-авашт лийыныт. Руш йылме дене иктешлыше кугыжаныш экзаменым 20 еҥ кучен да тынарак – математике дене.
Ты кечынак акцийыш Козьмодемьянск ола да У Торъял кундемыште илыше ача-ава-влак ушненыт: иктыштыже 15 еҥ шинчымашыжым терген ончен гын, весыштыже – 7.
Тыгай мероприятий моло районлаштат эрташ тӱҥалыт. Акций 30 апрельыште мучашлалтеш.
Г. Кожевникова
