Медведево район Пижма ялысе тӱвыра рӱдерыште шке пашаштым йӧратыше, уло шӱм шокшым пуэн тыршыше ӱдырамаш-влак тыршат.
Рӱдерыште кум пашаеҥ гына уло: вуйлатыше, художественный вуйлатыше да техперсонал. Туге гынат нуно икмыняр еҥын сомылжым ворандарен шуктат. Оралте кугу гынат, чыла вере ару, пырдыжым шке кид дене ыштыме тӱрлӧ радына сӧрастарат, ойыртемалтше тӱсым кӧршӧкыш шындыме пеледыш-влак пуртат.
Светлана Тарасова тиде тӧнежыште 2001 ий гыч пашам ышта. Тудо куэмдыме гобелен (нетканый гобелен), пластилинографий, лапчыкла гыч ургымо, пушкыдо модышым ыштыме, декупаж кружоклам вӱда.
Светлана Леонидовна ик верыште огеш шинче, вияҥеш, у кӱкшытым налеш. Тений тудо И.Палантай лӱмеш тӱвыра ден сымыктыш колледжым заочно тунем пытарен да культур ден каныме пашам виктарыше менеджер специальность дене дипломым налын.
– Ме Пижма школышто ИЗО предметым туныктышо Ирина Геннадьевна Лисова дене пеҥгыде кылым кучена. Тудо рӱдерлан кугу полышым пуэна. Тӱрлӧ конкурсышто вийнам пырля тергена. Теве ӱмаште «Юзо шондык» республикысе конкурсыш ушненна ыле. Тушто икымше ден кокымшо верым налынна. Мылам утларакшым куэмдыме гобелен ден алмазный тӱрлымӧ технике дене пашам ышташ келша. Куэмдыме гобелен йӧн полшымо дене ыштыме радына ковёрым ушештара. Тудым ямдылаш шкешотан име, меж шӱртӧ да мешакым ургымо куэм( бортовко) кӱлыт. А кружокыш коштшо икшыве-шамыч пластилинографийым йӧратат. Йоча дене паша ыштыме шулдыраҥда, ончыко каяш вийым ешара, – мане С.Тарасова.
Каласыман, Пижма тӱвыра рӱдер ден верысе тӱҥ школ ик оралтыште верланеныт, тыштак ФАП, йочасад уло. Нуно икте-весе дене умылен пашам ыштат. Йоча-влак рӱдер пелен почмо краеведений тоштерыште чӱчкыдынак уна лийыт. Воспитатель ден туныктышо-шамыч нунылан тӱрлӧ занятийым эртарат. А урок деч вара тӧнеж икшывын йӱкшӧ дене темеш. Икте куштымо кружокыш вашка гын, весе кидпашалан тунемеш.
Куштымо кружоклам рӱдер вуйлатыше Ирина Норкина наҥгая. Тудо рӱдерын пашаж нерген чон йӱлен каласкалыш.
– Ончыч Пижмаште клуб лийын, тудо тыглай пу пӧртыштӧ верланен, а у оралтым 1998 ийыште чоҥымо. 20 ий жапыште тудым ик ганат ачален огытыл. Шке вийна дене гына тидым-тудым шотыш кондаш тыршена. Краеведений тоштерна дене кугешнена. Тудым шке вий дене чумырымо, садлан тудо мыланна поснак шерге. Мыланна кугу полышым школ вуйлатыше ден туныктышо-шамыч пуат, нунын дене ик еш семын келшен илена, садлан нунылан кугу таум каласена, – палемден ӱдырамаш.
Л.ШАБДАРОВА.
М.Скобелевын фотожо.
