Образований» национальный проектын «кызытсе школ» федерал проектше дене келшышын, тений 1 сентябрьыште республикысе 15 тунемме верыште Цифровой да гуманитарный профилян «Кушмо точко» образований рӱдер почылтшаш.
Нунын кокла гыч иктыже Советский районысо Ургаш посёлкысо интернат-лицейыште лиеш. Тушто «Кушмо точко» рӱдерым почаш Марий Элын бюджетше гыч 250 тӱжем теҥгем ойырымо. Тыге таче кечылан тунемме верыште туврашым, пырдыжым уэмдыме, тыгак кӱварым керамогранит плитке дене леведме (снимкылаште). Лицейым вуйлатыше Н.Князеван мутшо почеш, дизайныште эн у – грифель пырдыж. «Йоча-влак асфальтыште сӱретлаш моткоч йӧратат, а южыжо – пырдыжыште. Сандене грифель пырдыж – коллектив дене пырля усталык паша, проектым ышташ ешартыш йӧн. Проект пашам ышташ келыштарыме пӧлемыште WI-FI уло», – палдарен тудо.
Г.КОЖЕВНИКОВА
