ЛӰМГЕЧЕ ШКОЛ ЙОЛГОРНО

Иканаште кок лӱмгече

У Торъял районысо Немда школ ноябрьыште лӱмгечыжым палемдаш тӱҥалеш. Тыште шукыжым тиде школымак тунем пытарыше туныктышо-влак пашам ыштат. Очыни, шочмо школын поро шӱлышыжӧ икшывыже-влакым шкеж деке эреак шупшеш.

Ик документ почеш школ 120 ийым тема, а весе дене келшышын – 80 ийым. Молан манаш гын Немда кундемыште шке жапыштыже икмыняр школ лийын. Иктыже  — Руш Куптӱрышӧ. Тудо 1898 ийыште почылтын. Тудо тыглай пу пӧртыштӧ гына верланен.  Вара ты кундемыште школ Йошкар Памашыште, Часамласолаште лийын. А Овалже ялыште школ 1938 ийыште почылтын, но тыгеже школышто 1937 ийыштак туныкташ тӱҥалыныт.

Школым  Совет Ушем Герой Михаил Лебедев, Российын сулло артистше-влак Олег Кузьминых, Василий Домрачев, Марий Элын сулло тӱвыра пашаеҥже Анна Османова, М.Шкетан лӱмеш Марий национальный драме театрын самырык артистше Иван Соловьев тунем пытареныт. Тиде школышто лӱмлӧ туныктышо Василий Сапаев туныктен. Тыгак спортышто сеҥымашым ончыктышо тунемше денат школ кугешна. Мутлан, Ярослав Егошин ече дене юниор-влакын Россий сборныйын членже. Шке жапыштыже тудо Швейцарийыште эртыше таҥасымаштат лийын. Спортлан туныктышо ден тренерже Лев Васильевич Пирогов кумылаҥден.

Ончыч тунемме верыште ече спортлан шуко верым ойыреныт гын, кызыт футбол дене секций уло. Тыгак «Йӱк-влакын шӱдыр тӱшкашт» музыкальный, кидмастар, экологий, шахмат, краеведений, моделирований кружок-шамыч пашам ыштат.

Моло семынак тыштат нелылык дене тӱкнат. Теве тиде тунемме ийыште 10-шо класс уке. 9-ше класс деч вара  тунемше-шамыч вес школыш каеныт, ссузлашке тунемаш пуреныт. Класслаште оборудований шагал. Чылаже кок кабинетыште гына чыла ситарыме. Компьютер классыште вич компьютер веле. Тыгак марий йылмым посна туныктышо уке. Марий йылме ден сылнымут шагатым икмыняр туныктышылан шеледен пуэныт. Тыге ты предметым школ директор Елена Мосунова, тӱҥалтыш класслаште туныктышо Эльвира Домрачева, руш йылмым туныктышо-влак Ольга Лебедева ден Людмила Лебедева туныктат.

– Нелылыкна уло гынат, ме вуйым огына саке. Пашам ышташ вийым тунемшына-шамыч пуат. Мутлан, тений марий йылме дене экзаменым вич еҥ кучен. Ме  марий йылмым шочмо йылме семын туныктена. Ача-ава-влак икшывылан йылмым шочмо йылме семын але кугыжаныш йылме семын туныктымо шотышо йодмашым чыланат возеныт. Каласыман, иктат шочмо йылме семын огына тунем манын ойлен огыл. Тидыже куандара.

Тыгак шукерте огыл икмыняр окнам вашталтеныт, пластиканым шынденыт. Оксам районысо бюджет гыч ойыреныт. Тунемшылан учебникым ситаренна. У тунемме ийланат сайын ямдылалтынна. Школым олмыкташ  оксам пуэныт, садлан тидын шотышто тургыжланен огынал. Шке пакчана уло, пареҥгым, кешырым, шоганым, йошкарушменым, ковыштам, помидорым, пеледышым куштена. Томатшым, росотажымат калыклан ужалена. А кеҥежым икшыве-влак участкыштына тыршат, июньышто йоча лагерь пашам ышта, тыгак тунемше-шамыч кеҥеж мучко шӱкшудым сомылат, вӱдым шават. Кызыт школ коллектив лӱмгечылан кыртмен ямдылалтеш. Садлан выпускникна, туныктышо-ветеран-влакым пайремышкына пагален ӱжына,  – каласен школ вуйлатышын алмаштышыже М.Мартынова.

Ме редакций лӱм дене школым шушаш шочмо кечыж дене алал кумылын саламлена, калыкнам чапландарыше еҥ-влакым кушташ тыланена!

Лидия ШАБДАРОВА.

Опубликовать в Одноклассники

Добавить комментарий