Звенигово район Красногорский поселкысо 1-ше №-ан кыдалаш школлан Российын Геройжо Владимир Шарпатовын – советский да российысе гражданский авиацийын лётчикшын лӱмжым пуымо.
ВВС-ын отставкыште подполковникше лачшымак тиде поселкышто шочын кушкын. Тудо Афганистаныште Кандагар ола воктенысе аэродромыш виешак шындыктыме Ил-76 самолётын командирже лийын. Пленыште идалык индыралтмеке, самолётын экипажше, пиалеш, куржын утлен кертын. Вараже лач тиде событийымак тӱҥлан налыныт да «Кандагар» фильмым сниматленыт.
Плен гыч утлымо деч вара икмыняр жап гыч Россий Президентын пунчалже дене Владимир Шарпатовлан Российын Геройжо лӱмым пуэныт.
Школлан у лӱмым ОНФ-ын «Геройын лӱмжым – школлан» Российысе проект дене келшышын пуэныт.
Школлан тудын лӱмжым пуымылан пӧлеклалтше торжественный мероприятийыш Владимир Шарпатов шкежат толын. Тыгай чапым ыштымылан тудо погынышо-влаклан тауштен. Тыгак йоча-влакым тунемме ий мучашлалтме, кеҥеж каныш тӱҥалме дене саламлен да Россий ӱмбалне эре тынысле кава лиеш манын ӱшанен ойлен. Тунемше-влак вашеш мутыштышт тудын, Российын Геройжын, подвигшым палат да аклат манын каласеныт.
Тачысе кечылан Российыште 329 школлан Герой-влакын лӱмыштым пуымо. Республикыште Красногорскысо 1-ше №-ан школ ОНФ-ын патриотический проектышкыже икымше ушнен. Марий Элыште ОНФ-ын пресс-службыжын палдарымыж почеш, вес тунемме ий тӱҥалтыште школ зданийын пырдыжыштыже шарнымашан оҥам почыт. Тушто ты школышто Российын Геройжо Владимир Шарпатовын тунеммыж нерген возымо лиеш.
Л.Камалетдинова.
