УВЕР ЙОГЫН

Куштырам лукмылан – льгото

2019 ий 1 январь гыч куштырам погымо да полигоныш лукмо паша коммунальный услуго радамыш пура. Шӱкшакым лукмылан тӱлымӧ у системым пуртымо дене тиде роскотлан компенсацийым шуко шочшан еш, инвалид да инвалид йочан еш-влак налаш тӱҥалыт. Тымарте нунылан тиде роскотым пӧртылтымӧ огыл.

Пашан ветеранже, репрессироватлыме да реабилитироватлыме, радиацийыш логалше граждан, Кугу Отечественный сарын ветеранже-влакын шӱкшакым лукмылан тӱлымӧ роскотыштым окса компенсаций дене тылзе еда пӧртылтат.

Палемдыме граждан-влаклан Калыкым социально аралыме органлашке ты шотышто нимогай документым кондыман огыл.

Тылеч посна илыме верлан да коммунальный услугылан субсидийым шотлымо годым шӱкшакым лукмылан тӱлымӧ роскотат шотыш налалтеш.

Палемдена, торым погыман да лукман илыме кундемлаште квитанцийым кажне пачерыш кондат, тидлан ойпидышым ыштыме огыл гынат.   

Шуко пачеран пӧртым виктарыше компаний куча гын, шӱкшакым лукмо услуго квитанцийыште посна строка дене палемдалтеш, моло годым граждан-влак посна квитанцийым налыт.

2019 ий 1 январь гыч куштырам погымо да лукмо услугылан тариф 1 еҥ деч тыгай лиеш: чыла шотыштат йӧнан пачерыште илыше-влаклан – 82, 73 теҥге (Козьмодемьянск олаште да Курыкмарий районышто илыше-влаклан – 75,74 теҥге), йӧнан огыл пачерыште илыше-влаклан – 85,86 теҥге (Козьмодемьянск олаште да Курыкмарий районышто илыше-влаклан – 78,61 теҥге).

М.ИВАНОВА.

Опубликовать в Одноклассники

Добавить комментарий