Шукерте огыл Шернур кундем Чылдемыр ял гыч самырык рвезе Дима Веденькин ВКонтакте вот-кылыште шке почмо «Марий улына!» тӱшкаштыже «Марий тÿрын сылнылыкше» конкурсым эртарен.
Ты мероприятий Россий кӱкшытыштӧ эртен. Тышке Ямал-Ненецкий автономный округ, Башкортостан республик, Киров кундем, Моско, Санкт-Петербург, Бирск олала гыч ушненыт. Чылаже 59 еҥ погынен. Сеҥыше радамыш луын лектыныт. Тиде — Константин Иванов, Ольга Вайшева, Лиана Иванова, Алиса Куклина, Кристина Лебедева, Марина Воронцова, Виктория Мамаева, Алёна Соловьёва, Виктория ден Ульяна Шулеповамыт. Гран-при Алина Егошиналан логалын.
«Спонсор полышым Марий Эл Кугыжаныш Погынын депутатше Сергей Белоусов, Марий тӱвыра рӱдер, Тимофей Евсеев лӱмеш калыкле тоштер, йоча-влаклан пайремым ыштыше «Мультяшки» ден «Непоседы» организаций-влак, Марий самырык театр, «Марий Эл» радио, Марий Эл Писатель ушем, «Марий Эл» да «Кугарня» газет-влак пуэныт. Чылаштланат моткоч кугу таум каласена», — палемдыш уста рвезе.
О.МОШКИНА
